Skënderbeu tenton Likën, FIFA mban në ankth klubin
Afrimet kanë stabilizuar mbrojtjen, nevojë për... eksperiencë
Me zyrtarizimin e katër afrimeve të para në këtë merkato duket se Skënderbeu ka nisur periudhën e përforcimit të ekipit dhe pritshmërisë për të dalë nga kriza e rezultateve dhe fundit të renditjes. Duke u ndalur tek afrimet, pritet që trajneri Julian Ahmataj të lehtësojë vështirësitë e mëdha që ka pasur në prapavijë në pjesën e parë të kampionatit. Zguro, Abei, Sadriu dhe Bajrami duket se i japin numrat e kërkuar trajnerit bardhekuq për forcimin e repartit difensiv, i cili ka qenë më i kritikuari gjatë kësaj periudhe. Duke i shtuar edhe rikthimin e Shalës, tashmë mbrojtja duket e kompletuar për bardhekuqtë. Në kushte të tilla, përqendrimi tashmë do të zhvendoset në repartet se tjera të ekipit, atje ku trajneri bardhekuq kërkon më shumë cilësi dhe eksperiencë. Mesfusha dhe sulmi do të jenë në proces kërkimi për t’u përforcuar. Trajneri Ahmataj po kërkon elementë, të cilët mund të japin kontributin e tyre, jo vetëm në fushë, por në rritjen e aspektit psikologjikisht të skuadrës që ka moshë të re.
GILMAN LIKA - Ideja më e fundit e merktos që po qarkullon është ajo e shkodranit Gilman Lika. Emri i Likës ka filluar të lakohet mjaft në ambientet e klubit korçar dhe nga burime parën palëve mësohet se janë zhvilluar kontaktet e para mes klubit dhe lojtarit, në mënyrë që Lika të vishet bardhekuq. Shkodrani prej muajsh është pa ekip dhe
kërkon një destinacion të ri për pjesën e mbetur të sezonit. Korça nuk është ambient i panjohur për Likën dhe kjo mund të shihet si një faktor plus që mund të ndikojë në ardhjen e tij në Korçë. 33-vjeçari është një tip lojtari që pëlqehet shumë nga Ahmataj, plus që
trajneri sheh tek ai një element shumë të rëndësishëm që mund të ndërtojë ekipin për sezonin në vazhdim. Në kushte të tilla, presidenti Takaj është angazhuar për ta përmbyllur këtë transferim që do të ndryshonte komplet ekipin për pjesën e mbetur të kampionatit,
duke i shtuar cilësi.
MERKATO - Pavarësisht se klubi nxitoi ditën e djeshme për të publikuar katër zyrtarizimet e para, lojtarët të paktën për momentin nuk janë ende zyrtarisht pjesë e Skënderbeut. Kjo për vetë faktin se nuk janë federuar ende në FSHF si lojtarë të korçarëve. Kjo për arsye se, sikundër bëjnë me dije burime pranë klubit, merkatoja e korçarëve qëndron e mbyllur. Sistemi TSM është ende i bllokuar nga ana e FIFA-S për shkak të detyrimeve që Skënderbeu kishte karshi francezit Aranaud Guezh.