Hajdari, “frikë” nga ngjeshja: Do sjellë pasoja
BESËLIDHJA/ Sulmuesi i kënaqet shtyrjes, por mendon se ngarkesa do jetë e papërballueshme
Besëlidhja përmbys programin. Të nxitur nga shtyrja e kampionatit, stafi teknik është detyruar që të ndryshojë axhendën stërvitore. Këtë të shtunë zyrtarisht nuk luhet dhe rrjedhimisht seancat do të vazhdojnë me ritëm të lartë, të patën deri në ditën që do të marrin njoftimin nga FSHF-JA për rinisjen e Kategorisë së Parë. Edhe pse u gëzohen ditëve që do të kenë në dispozicion, në Lezhë i druhen ngjeshjes që i pret në vazhdimësi. Kanë mbetur për t’u luajtur edhe 2/3 e ndeshjeve, do të jenë të detyruar që të luajnë edhe në mesjavë e kjo për një skuadër që nuk ka stol të bollshëm, mund të bëhet e papërballueshme. I këtij mendimi është edhe sulmuesi Arsen Hajdari, i cili për “Panorama Sport” shpreh sikletin që do të sjellë një tjetër shtyrje. “Nisëm një tjetër javë përgatitjesh. Edhe pse mendonim se do të luanim të shtunën me Vorën, kjo nuk do të ndodhë. Shtyrja e kampionatit e ka detyruar stafin teknik që të ndryshojë edhe programin stërvitor. Nuk është se na dëmton kjo gjë, përkundrazi. E shohim si të dobishme, sepse na jep kohë të mjaftueshme për të rikuperuar plotësisht energjitë dhe korrigjuar ndonjë gabim. Plus që është shans për afrimet e reja, pasi kanë kohë të përshtaten me pjesën tjetër. Për momentin jemi të kënaqur me vendimin e dhënë nga FSHF, por në vazhdimësi mund të ndikojë negativisht. Kemi edhe 2/3 e sezonit pa luajtur. Sa më shumë të kalojë koha, aq më i ngjeshur do të bëhet kampionati. Ngarkesa nuk është e mirë, pasi situata mund bëhet e papërballueshme, por ky është i njëjti hall për të gjitha skuadrat dhe nuk shoh ndonjë persekucion selektiv. Besëlidhja ka një objektiv dhe ne do të luftojmë që ta arrijmë, pavarësisht se jemi -8 nga kreu. Duke e ditur se shumica e pikëve janë në lojë dhe se ne si skuadër e kemi marrë seriozisht misionin ‘Superiore’, shpresoj që t’ia dalim me sukses”, përfundoi shkodrani i Besëlidhjes. PRENG GJIKOLA