Nedim Bajrami dopietë, por në Kupë kalon Napoli

Napoli përmbush misionin në Kupën e Italisë, por protagonist në stadiumin “Diego Armando Maradona” ishte Nedim Bajrami. Sulmuesi nga Tetova ishte autor i një dopiete fantastike, që në të dyja rastet barazoi përkohësisht rezultatin. Nëse Napoli zhbllokoi ndeshjen që në minutën e 18-të me Di Lorencon, pas një goditjeje me kokë, mesfushori shqiptar i Maqedonisë vendosi baraspeshën në të 33-ën me një të djathtë të pakapshme. Përpara fundit të pjesës së parë, Lozano i dha sërish avantazhin Napolit (minuta 38-të), por në të 68-ën erdhi një tjetër perlë e mesfushorit të Empolit, me Bajramin që dhuroi një tjetër goditje prej fenomeni. Gjithsesi, të kaltrit kanë shumë armë të rëndësishme, siç është gjiganti Petanja për shembull, i cili me një goditje me kokë në të 77-ën konfirmoi se meriton më shumë sesa të jetë një rezervë luksi në klubin e De Laurentisit. Mes rrëmujës në zonë, Petanja kërceu saktë me kokë dhe vulosi shifrat finale në 3-2, të cilat dërguan Napolin në çerekfinalet e Kupës së Italisë. Gjithsesi, në fund të ndeshjes, lojtari më i mirë në fushë u vlerësua pikërisht shqiptari Nedim Bajrami, me notën 7.5: “Bën gjithçka do mes linjave të mesfushës dhe

mbrojtjes së Napolit, duke treguar personalitet dhe një goditje kirurgjikale. Dopietë fantastike me dy goditje balistike, të cilat sigurisht nuk do të kenë mbetur pa tërhequr vëmendjen drejt 21-vjeçarit nga Tetova. Ndërkohë, për t’u theksuar është mungesa në Kupë e Elseid Hysajt, i cili konfirmon gjithmonë e më shumë se marrëdhënia mes tij dhe klubit të Napolit është krisur totalisht.