Ky Inter më i miri i dekadës, ka përmbysur hierarkinë me Juven
Si një krijesë mitologjike, më në fund është shfaqur. Pak përpara fundit të fazës së parë ka lindur përfundimisht Interi i Kontes. Ajo që trajneri kishte dëshiruar, prekur, por asnjëherë nuk kishte gjetur. Një skuadër sulmuese pa mungesë ekuilibri, mbrojtëse pa u dorëzuar, me një fjalë, “fituese”. Asnjëherë Interi në dekadën e fundit nuk kishte mbyllur fazën e parë përpara bardhezinjve. Të dielën në mbrëmje, duke mposhtur Pirlon në një mënyrë më të pastër sesa tregon rezultati 2-0, Konte theu dy tabu në një goditje të vetme: ai vetë mori hak kundër “Zonjës” që gjithmonë e kishte mposhtur dhe, njëkohësisht, i lejoi Interit të shikojë bardhezinjtë nga lart në gjysmën e kampionatit. Nuk ndodhte nga viti “post-tripletës”, kur Juvja e mbylli në vendin e shtatë. Përtej kapjes së mundshme të Ibrës në krye sot, Konte në çdo rast ka rishkruar historinë e kohëve të fundit të turneut. Në edicionin 2013-’14, të fundit përpara se të përplaste derën te Juvja, Konte bardhezi mbyllte fazën e parë me 56 pikë (në fund të sezonit do të kapte kuotën marramendëse 102) dhe Interi i Maxarrit e ndiqte 20 pikë prapa. Është distanca më e madhe e dekadës, e përsëritur vitin pasardhës edhe nga Masimiliano Alegri, pasardhësi i tij në Torino, fundi i fazës së parë me 46 pikë, Interi i Mançinit 26.
KAPJE DHE PARAKALIM – Konte megjithatë përsërit që distanca me Juventusin ende nuk është ngushtuar, megjithëse realiteti dhe shifrat tregojnë të kundërtën. Kapja dhe parakalimi janë të certifikuara. Vitin e kaluar, porsa u transferua tek Interi, në të 19-ën trajneri zikaltër ishte i dyti me -2 pikë nga bardhezinjtë, ndërsa këtë herë e ka kaluar me +6. Përtej klasifikimit, megjithatë, mbetet imazhi i një Interi më në fund “kontian”. Sfida ndaj Juves është konfirmimi i skuadrës përfundimtare sepse trajneri më në fund ka korrigjuar problemet.
EKUILIBËR I RI – Tani kriza e klubit është e ditur, pritet vetëm të kuptohet se çfarë do të ndodhë me paketën aksionare të Interit, ndërkohë që po këmbëngulin fonde të ndryshme. Pikërisht në këtë “stuhi”, Konte ka arritur të ekzaltohet. Dhe grupi ka dalë i pjekur, i përforcuar, nëse deri tani përballjet direkte (si me Milanin dhe Realin) kishin qenë një problem i madh, fitorja kundër Juventusit konfirmoi kalimin e çdo kompleksi inferioriteti. Faktor ka qenë pa dyshim edhe golat. Në sezonin aktual kanë rekordin e golave të shënuar në këtë pikë të kampionatit (45), me një përqindje shënimi (15,9%) që nuk e kishin pasur asnjëherë kaq të lartë nga 2011-’12. Dhe pavarësisht se golat e pësuar janë 23, skuadra ka reduktuar në minimum goditjet e pësuara (182 në total). Në fund, por jo për nga rëndësia, ka ringritur lojtarë jashtë projektit (si Brozoviç dhe Shkriniar), duke rritur edhe nivelin e kampionëve, Hakimit dhe “Lu-la”-s. Ligji i Kontes tani mund të vlejë titullin.