Jeboah, një ganez në Fier: S’dorëzohemi për mbijetesën
Mesfushori: Ka ndikuar mungesa e eksperiencës
Fierakët kanë nisur javën finale të përgatitjeve anti-tiranë. “Ruleta” e kampionatit e vendos Apoloninë përballë bardhebluve në një moment kur skuadra e Kamaratës ka prekur fundin. Janë dy ekipe me objektiva të kundërt në kampionat, por me interesa të njëjtë në përballjen e radhës: pikët. Mesfushori shtatshkurtër ganez, Kofi Jeboah, po luan sezonin e tij të parë tek Apolonia. 25-vjeçari ka luajtur më parë për Tadamon Sour në Premier Ligën e Libanit, ka fituar 1 kampionat dhe 1 Superkupë me skuadrën ganeze Legon Cities, si dhe ka qenë edhe pjesë e kombëtares Gana U-20. Për fanellën e Apolonisë, Jeboah numëron 1286' në 18 ndeshje të luajtura. Ekskluzivisht për “Panorama Sport”, mesfushori flet mbi mbresat për Shqipërinë, eksperiencën e tij tek Apolonia, si dhe mundësitë e skuadrës për mbijetesë. SHQIPËRIA - “Nuk e kam njohur më parë, vetëm si emër e kisha dëgjuar Shqipërinë, por kam përshtypjet më të mira për vendin tuaj dhe për shqiptarët. Nëse do të lejoheshin tifozë nëpër stadiume, besoj se do ta njihja më mirë edhe pasionin që njerëzit kanë për futbollin”. SKUADRA - “Apolonia është një ekip me shpirt luftarak që përpiqet të bëjë më të mirën në fushën e lojës dhe në shumë ndeshje ka luajtur si e barabartë edhe me skuadrat kryesuese. Më pëlqen se është një ekip me lojtarë të rinj në moshë dhe që premtojnë për një të ardhme shumë më të mirë, pavarësisht rezultateve jo aq pozitive që kemi gjer tani. Unë ndihem mirë, ka mjedis të ngrohtë, harmoni dhe marrëdhënie të shkëlqyera si grup”.
MBIJETESA - “Mungesa e përvojës ka bërë të vetën dhe rezultatet nuk janë atje ku duhet. Nuk kemi mundur të krijojmë një ecuri të qëndrueshme, sepse edhe kampionati është shumë i fortë dhe ka kundërshtarë me cilësi. Por, nëse shtojmë përqendrimin dhe përgatitemi me kujdes për çdo ndeshje, duke i marrë një nga një, unë mendoj se arrijmë të qëndrojmë në Superligë. Mjafton të luajmë të qetë dhe pa presion”. TIRANA - “Është një kundërshtar i vështirë, kampione në fuqi dhe nuk ka nevojë për shumë fjalë. Ne jemi të përgjegjshëm për atë që na pret, prandaj po e përgatisim me vëmendje dhe mobilizim. Na duhen pikët dhe nuk kemi se çfarë të humbasim, kështu që do të luajmë për të marrë rezultat pozitiv. Nuk mendoj se presioni është te ne, përkundrazi, është te kundërshtari dhe ne duhet ta shfrytëzojmë këtë situatë”.
E ARDHMJA - “Në fund të kampionatit, skadon edhe kontrata ime me Apoloninë. A do të vazhdoj të jem pjesë e saj edhe përtej këtij sezoni? Kjo gjë mbetet për t’u parë, nuk vendoset tani. Të sigurojmë objektivin njëherë, pastaj do të vendosim bashkë me klubin nëse do të vazhdojmë marrëdhënien e mëtejshme”, thotë për gazetën mesfushori i Apolonisë, Kofi Jeboah. BUJAR RAMA