Shkumbini ngec në Luz, Sopoti rrëmben kreun
Librazhdasit të parët, shpartallojnë Shënkollin në shtëpi
Shkumbini ndalet në Luz, ndërsa Sopoti sh katërron Shënkollin dhe merr kreun e grupit A të Kategorisë së Dytë pas 17 javësh kampionat, duke qenë tashmë me një pikë më tepër se peqinasit. Në ndeshjen e luajtur në Luz u shënuan katër gola, por nuk pati fitues. Loja i kishte të gjitha brenda, nga kartonë të kuq dhe deri te tre penalltitë e akorduara. Në minutën e 17-të mesfushori Zuna pengohet në zonën peqinase dhe ka penallti. Myslimi
tregohet i saktë dhe kalon Luzin në avantazh. Shkumbini reagon menjëherë, teksa kapiteni Ramazani ndjek një top të ardhur nga goditja e këndit dhe barazon shifrat. Gjatë minutave në vijim, Moukoko, Myslimi dhe Ramazani rrezikojnë portat. Gjithsesi, peqinasit
bëjnë diferencën në fillimin e pjesës së dytë, kur Lamçja pengohet nga Xhika dhe gjyqtari akordon penallti. Ekzekuton Mustafaj dhe kalon peqinasit në avantazh. Mirëpo, sulmuesi peqinas bëhet protagonist negativ në minutën e 77-të, duke lënë Shkumbinin me 10
lojtarë pas ndëshkimit me të kuq për shkak të një ndërhyrjeje të gabuar. Luzi merr zemër afër fundit dhe bën gjithçka për të shkuar te barazimi. Insistimi i vendësve shpërblehet në shtesë, kur pas një prekjeje të topit me dorë, arbitri akordon penallti për Luzin. Nga pika
e bardhë është sërish Myslimi, që godet saktë dhe vulos barazimin 2-2.
GOLEADA - Tjetër fitore e thellë e librazhdasve të Besnik Kolës, këtë herë ndaj Shënkollit me tetë gola. Ky triumf ishte i veçantë, pasi përkoi edhe me kryesimin. Goli i Arnold Rreshkës që në minutën e 6-të pret hovin e lezhjanëve dhe i jep Sopotit hapësirën e duhur që të kthejë ndeshjen në goleadë.
Kapiteni Mirel Çota, pasi merr një pas perfekt nga Sejdini, shënon golin e dytë për Sopotin. Golat pasojnë njëri-tjetrin, pasi Sejdini trefishon nga pika e bardhë. Pa u mbyllur pjesa e parë realizoi një supergol, Endri Goci. Në pjesën e dytë pati vend edhe për dy gola të tjerë të Çotës, si dhe Llojkut e Kullafi. Për Shënkollin realizoi Ndoj golin e nderit dhe gjithçka mbyllet 8-1.