Gol nga mesfusha, por Spanja është superfuqi
Kosova ndryshoi skemën, polemika për stolin e Ramosit
Kosova e dinte që të merrte pikë me Spanjën ishte mision i vështirë dhe i tillë rezultoi. Shkoi aty për të luajtur futboll, në një situatë aspak të qetë për shkak të problemeve politike mes dy vendeve dhe arriti të shënonte një gol spektakolar me Halimin. Por, vetëm kaq nuk mjafton. Në Sevilje ekipi i Luis Enrikes arriti të fitonte 31 falë paraqitjes pozitive të Olmos dhe Torresit, mirëpo edhe këtë herë nuk munguan polemikat. Serxho Ramos e nisi nga stoli.
MAGJI E OLMOS - Bernard Shaland ndryshon skemën për të përballuar sulmet e shumta të Spanjës duke kaluar në një 3-4-1-2, me Hadërgjonajn, Dresheviç dhe Alitin. Nga ana tjetër, Luis Enrike konfirmoi modulin 4-3-3 por la jashtë fushës së lojës kapitenin Serxho Ramos. Ishte një vendim teknik, i cili hapi shumë diskutime në Spanjë. Pjesa e parë ishte e gjitha në favor të Spanjës, nga fillimi deri në fund. Nuk vuajti kurrë në mbrojtje dhe në sulm ishte e rrezikshme duke kërcënuar disa herë portën e Ujkanit. Ky i fundit bëri 2 pritje mjaft të mira, por në të drejtën nuk mundej. Ishte spektakolare goditja e Dani Olmos, e djathta e të cilit shkon në trekëndëshin e Ujkanit. Ky i fundit thjesht e pa atë gol magjik. Dy minuta më vonë erdhi edhe goli i dytë për Spanjën dhe mbante firmën e Ferran Torresit. Dy sulmesit janë duke kaluar një formë mjaft pozitive dhe këtë e konfirmuan në fushën e lojës. Spanja kishte edhe raste të tjera për të shënuar, por nuk ia doli. Kosova u mundua të mbrohej, por nuk mundi t’u bënte ballë sulmeve të shumta të iberikëve.
SUPER HALIMI - Edhe pjesa e dytë kishte të njëjtën panoramë si ajo e para, me Spanjën që dominon çdo dyluftim dhe krijon futboll të shpejtë. Por, iberikët humbën shënjestrën përpara portës së Ujkanit. Një aventurë e portierit Pau Torres futi në lojë Kosovën. Dalja e tij e gabuar deri në mesfushë solli një supergol të Halimit. Lojtari i “Dardanëve” ia rrëmbeu topin dhe duke mos u menduar dy herë tentoi portën nga mesfusha. Askush nuk e ndali dot
goditjen e tij perfekte, e cila kërkonte një gjest të lartë teknik. Por, festa e Kosovës zgjati shumë pak. Nga një goditje këndi u shënua edhe goli i tretë dhe që vulosi triumfin e iberikëve. Moreno e devijon dhe i jep 3 pikë të rëndësishme për të marrë përkohësisht vendin e parë në renditje. Suedia ka një pikë më pak, por një ndeshje më pak. Kosova pas 2 ndeshjesh nuk ka grumbulluar asnjë pikë.