“Lushnja drejt privatizimit”, Çobani ka një apel për bashkinë
Ish-presidenti: Të ruhet buxheti dhe të shkojë për infrastrukturën
Lushnja është një klub në varësi të plotë të Bashkisë. Kapitali themeltar i regjistruar është 3,5 milionë lekë (të rinj) dhe zotërohet nga Bashkia Lushnjë. Ky kapital është i ndarë në 3500 aksione, me vlerën e 1000 lekëve secili, ku anëtarët e Këshillit Bashkiak janë në rolin e aksionerit. Artur Çobani, ish-futbollisti dhe ish-presidenti i klubit Lushnja mbetet një figurë mjaft popullore atje. Çobani foli për situatën aktuale të futbollit verdhejeshil. Ishpresidenti tha për “Panorama Sport” se Lushnja po shkon drejt privatizimit dhe ringritja e verdhejeshilëve është detyrë e të gjitha strukturave.
Zoti Çobani, ligji e thotë qartë, që deri në korrik klubet duhet të jenë të privatizuara...
Për këtë ka një afat 1vjeçar, ku klubet duhet të deklarojnë gjendjen e tyre, inventarizimin, si dhe të pasqyrojnë situatën e plotë juridike dhe fizike.
Lushnja është në varësi të plotë të bashkisë, që zotëron 100% të kapitaleve. Jeni në dijeni të ndonjë hapi konkret?
Te Lushnja ka përpjekje për ta privatizuar klubin. Ka interes dhe janë 2-3 kërkesa për klubin, për të gjetur bashkëpunimin.
Bashkia jep 400 milionë lekë nga buxheti i saj për klubin e futbollit...
Opinioni im është që ky buxhet duhet të ruhet, pra, të mbetet në këto kuota. Por, një pjesë e këtij buxheti duhet të shkojë për infrastrukturën. Të kemi kontrata të lehta me futbollistët dhe në këtë buxhet të përmirësohet infrastruktura.
Sapo u mbyllën dy fazat dhe Lushnja është pozicionuar në zonën “play out”. Ju bën përshtypje?
Mua më ka pëlqyer fakti, që te Lushnja janë afruar lojtarë të rinj. Lushnja është në fazën “play-out”, por në diferenca shumë të mëdha me vendin e 7-të dhe të 8-të. Më vjen mirë që janë përkrahur lojtarët e rinj. Një skuadër me djem të rinj dhe më shumë investime në infrastrukturë është ajo që i duhet Lushnjës.
Po thoni që ju pëlqen kjo skuadër...?
Është një skuadër e mirë dhe me dëshirë. Shumë e goditur nga pandemia. Shumë më e goditur nga skuadrat e tjera, por e përgjithshmja është e mirë.
Lushnja e nis fazën e tretë në shtëpi me Flamurtarin. Si e parashikoni këtë takim?
Lushnja i ka marrë me shumë meritë 6 pikë Flamurtarit. Si në Vlorë edhe në Lushnjë, me një lojë të mirë dhe me dy gola spektakorë. Si ai i Xekës në Vlorë, edhe i Haxhiut në Lushnjë. Është favorite për të fituar. ALBAN ALUSHI