Shtangë, Gjoza: Gati për Europianin
“Dënimet për dopingun do të jenë të rrepta, asnjë tolerim për Çerçizin dhe trajnerin”
Pasi kaloi një vit thuajse me të gjitha eventet ndërkombëtare të anuluara prej pandemisë, Shqipëria e peshëngritjes tashmë është gati për të garuar në Kampionatin Europian që do të zhvillohet në Rusi nga data 3 deri më 11 prill. Kombëtarja kuqezi do të përfaqësohet në këtë aktivitet me 5 sportistë, të cilat janë: Briken Calja, Erkand Qerimaj, Daniel Godelli, Krenar Shoraj dhe Evangjelia Veli. Kjo e fundit ka arritur të gjejë gjuhën e përbashkët me federatën pas disa mosmarrëveshjeve në muajt e fundit. Ndërsa trajnerë të përfaqësueses tashmë janë Kreshnik
Leka dhe Artur Lagja. Delegacioni kuqezi i udhëhequr nga presidenti i FSHP-SË, Elez Gjoza, prej dy ditësh ka mbërritur në Moskë. Në lidhje telefonike për “Panorama Sport”, Gjoza bën të ditur se pritshmëritë për këtë event janë të larta, sidomos nga Briken Calja, i cili prej vitesh është kthyer në një garanci medaljesh për Shqipërinë në arenën ndërkombëtare. “Ndonëse kushtet kanë qenë të vështira për shkak të pandemisë, ekipi ka bërë stërvitje serioze dhe është në gjendje shumë të mirë. Gjatë grumbullimit nën drejtimin e trajnerëve Leka dhe Lagja, grupi i peshëngritësve është përgatitur mjaft mirë dhe të pestë sportistët i kanë rritur ndjeshëm treguesit e tyre fizikë dhe teknikë. Kështu që, pritshmëritë tona në Kampionatin Europian janë të larta për të gjithë shtangistët, por në mënyrë të veçantë nga Briken Calja”, deklaroi Gjoza për gazetën në një lidhje telefonike pas mbërritjes në Rusi.
TOLERANCË ZERO NDAJ DOPINGUT Kreu i peshëngritjes shqiptare u rikthye të flasë për pezullimin përjetë të shtangistit Arbër Çerçizi si dhe të trajnerit të tij Riza Fejzullahu (5 vite), pasi sportisti i Apolonisë rezultoi pozitiv me kokainë në testin e bërë nga federata gjatë kampionatit kombëtar. “Gjatë kontrollit tonë sportisti doli pozitiv me kokainë dhe nga FSHP toleranca do të jetë zero për të gjithë, qofshin peshëngritës apo trajnerë. Dënimet që do të japim do të jenë shumë të rrepta, për çdokënd që përfshihet në përdorimin e substancave të ndaluara”, deklaroi Gjoza, duke konfirmuar dorën e hekurt të federatës dhe duke i dhënë një mesazh të qartë të gjithëve në komunitetin e shtangës, që duhet të qëndrojnë larg substancave të ndaluara.