Hysa drejt rikuperimit, Spaho: Flamurtari na ndali me fanellë

Ka rikthime te Lushnja. Pak ditë para përballjes me Elbasanin, plotësohet grupi. Qendërmbrojtësi Aldo Bani ezauron skualifikimin njëjavor, ndërsa sulmuesi Vilfor Hysa po shkon drejt rikuperimit. Pas një dëmtimi të përsëritur, këtë javë mund të zbresë në fushë. Lajme të mira ka edhe për qendërmbrojtësin Adriatik Basha. 22-vjeçari do të heqë allçinë (pas dëmtimit që mori para 6 javësh në ndeshjen me Tomorin), ndonëse këtë sezon e ka mbyllur që tani. “Nesër do të heq allçinë, por ky sezon për mua ka përfunduar”, është shprehur Basha për gazetën. – Mikel Spaho analizon barazimin e fundit. Ai mendon se Flamurtari u mori një pikë me fanellë, ndërsa “qan” rastet e shpërdoruara. “Unë mendoj që Flamurtari na mori një pikë me fanellë. Lushnja me rastet që krijoi meritonte të fitonte, por humbëm mbi 4-5 raste për golin e tretë. Nga këndvështrim im, them se ndeshja me Elbasanin është e vështirë. Luhet në transfertë dhe kërkon më shumë përqendrim. Nuk kemi shumë që jemi përballur me ta këtu në Lushnjë dhe ata humbën një penallti kur loja ishte 1-1. E vlerësojmë kundërshtarin dhe po punojmë për ta fituar sfidën me të”, u shpreh fillimisht për “Panorama Sport” kapiteni. Verdhejeshilëve u duhen ende pikë për të siguruar mbijetesën. Në pesë ndeshje të mbetura, lushnjarëve u duhen edhe dy fitore. “Unë jam dakord se në 5 ndeshje të mbetura, një diferencë prej 9 pikësh është e konsiderueshme. Lushnja nuk ka luajtur ndonjëherë për mbijetesë, por them që duhet të sigurohemi artimetikisht sa më shpejt të jetë e mundur. Së pari, të shikojmë nga ndeshja e radhës, që duhet ta luajmë për fitore dhe së dyti, kemi një kalendar që pas përballjes me Elbasanin na lë dy javë rresht pushim. Skuadra duhet të jetë e tonifikuar, derisa matematika të mbyllë gjithçka”, është shprehur Spaho.

SPAHO ALBAN ALUSHI