Kastrioti, Mehmeti: Koha për tri pikë
Xhuljo Mehmeti është një nga titullar absolut te Kastrioti i këtij sezoni. Mesfushori 27vjeçar ka zhvilluar 43 ndeshje në total me fanellën krutane në këto dy vite që është pjesë e ekipit, teksa më parë kishte luajtur në Superiore me Kamzën. Në një intervistë për “Panorama Sport” mesfushori komenton ndeshjen e fundit me Bylisin, atë të radhës me Kukësin, si dhe flet për aspektin personal.
Barazimi në Ballsh ju kënaqi apo prisnit më tepër?
Ishte një ndeshje e vështirë, pasi Bylisi është ekip shumë i fortë në fushën e vetë. Për ata ishte një shans shumë i mirë të na afroheshin, ndërsa për ne ishte hera e parë që luanim në presion pikësh këtë sezon. Ishte një provë karakteri për të gjithë ne dhe jemi të kënaqur për pikën e marrë.
Prisni Kukësin të shtunën, si e parashikoni?
Me Kukësin janë detyrim 3 pikët, pasi kemi disa javë që nuk i kemi shijuar, por edhe mund t’i kemi merituar në disa ndeshje. Kukësi ka lojtarë me kualitetet më të mira të këtij kampionat. Nuk e kuptoj që një ekip si ata mos të luftojnë për Europë ose për kampion. Megjithatë, i respektojmë, por nuk i mbivlerësojmë. Këtë herë kemi dëshirë të madhe për të marrë 3 pikët dhe për të vazhduar rrugën tonë drejt qëndrimit në Superligë, që është edhe objektivi i klubit.
A kënaqet Kastrioti me një pikë nga kjo përballje?
Siç e thashë më lart, ne po e përgatisim ndeshjen për ta fituar, kemi dëshirë shumë të madhe. Jemi të motivuar, por nëse ndeshja sjell ta papritura, barazimi do të ishte më mirë se humbja.
A keni bërë llogari sa pikë i duhen Kastriotit për të siguruar qëndrimin?
Besoj se gabimi më i madh për ne do të ishte të merremi me llogari. Ka edhe 10 javë kampionat dhe ne duhet të llogaritim vetëm fitoren në ndeshjen e radhës. Nuk ke si bën llogari në një kampionat ku diferencat nga fundi deri në majë janë të vogla.
Si do ta konsideronit këtë sezon në aspektin personal?
Pas janarit kam pas gjendje fizike të mirë dhe deri diku jam i kënaqur, sepse në dy fazat e para vuajta pak me dëmtimet dhe me virusin. Tani kam arritur vazhdimësinë, gjë që është e rëndësishme për një futbollist. Shpresoj ta mbyllim mirë dhe atëherë do ta quaja sezon pozitiv. BUJAR BALLIU