Brdariç: Në Laç nuk thyhemi
“Ndeshje shumë e rëndësishme për ne, dua të fitojmë në të dyja frontet”
Trajneri i Vllaznisë, Tomas Brdariç, be son se skuadra e tij do të thyejë sot tersin e dy humbjeve me Laçin. Në konferencën para transfertës me kurbinasit, gjermani u shfaq entuziast veçanërisht për faktin se prej tri ditësh e përgatit ndeshjen në fushën e stadiumit “Loro Boriçi”. Duke qenë se me Laçin luhen dy takime radhazi, sot për kampionat në 16:00 dhe më 14 prill në Shkodër për gjysmëfinalen e Kupës, Brdariç u ngacmua se në çfarë kompeticioni do të fokusohet më tepër Vllaznia. Ndërkohë, i pyetur nga “Panorama Sport”, gjermani refuzoi të replikonte me trajnerin e Laçit, Shpëtim Duro, i cili pati thënë se do ta linte vetë ekipin nëse përmbysej me 9 pikë në krye.
Do të luani me Laçin dy ndeshje radhazi. A mund të ketë sukses Vllaznia në të dyja kompeticionet?
Dëshira e kujtdo është të fitojmë në të dyja kompeticionet, por le të shohim se si do shkojnë gjërat. Fillimisht jemi të përqendruar te ndeshja e kampionatit. Më e rëndësishme është loja e nesërme (sotme) kundër Laçit. Gjendja fizike e ekipit nuk është e keqe. Përgatitja që kemi bërë është e mirë, por kemi pasur edhe disa probleme.
Kur thoni probleme, u referoheni dëmtimeve të Imamit dhe së fundmi edhe Imerit?
Për sa u përket dëmtimeve, vetëm Imami ka pasur probleme fizike. Pjesa tjetër e ekipit është e shëndoshë. Sa për Imerin, kush e ka thënë që do të mungojë?! Unë do ta shikoj deri në momentet e fundit. Do të bisedoj me lojtarin, pasi të konfirmoj edhe gjendjen e tij fizike e më pas do të shihet nëse do të jetë nga minuta e parë apo jo.
Në ditët e fundit jeni stërvitur në fushën e stadiumit “Loro Boriçi”. Është kjo ajo që keni kërkuar?
Jam i kënaqur, sepse kemi punuar shumë mirë këtë javë.
Kemi pasur fatin që jemi stërvitur në stadium dhe kjo është një gjë shumë e mirë për ne. Kam shumë lojtarë në dispozicion dhe më kënaq gjendja e tyre.
Laçi është i vetmi ekip që nuk keni arritur t’i merrni pikë në dy fazat e para. Besoni se këtë herë do të thyhet tersi?
Po, e vërtetë është që Laçit nuk i kemi marrë pikë, por do të provojmë t’i marrim pikë këtë herë. Çdo lojtar duhet të japë maksimumin ndaj Laçit, sepse është një ndeshje shumë e rëndësishme për ne.
Besoj se do të jetë dita jonë për të marrë një rezultat pozitiv.
Rruga për në Europë është më e lehtë nga Kupa apo kampionati?
Jemi të përqendruar te kampionati dhe jo te Kupa. Kemi shumë detyra përpara, i kemi eliminuar disa probleme, tani të shohim se si do të ecë skuadra.
Trajneri i Laçit, Shpëtim Duro, pati thënë se do të largohej nëse ishte 9 pikë para në krye dhe më pas ekipi i tij përmbysej. Keni një koment për këtë?
Jo, s’kam asnjë koment.