Orges Shehi: Korçë, sot nuk të... njoh
“Na presin 10 finale, kush gabon më pak do të marrë titullin”
Orges Shehi dhe Skënderbeu kanë një lidhje të pandarë në historinë e njëritjetrit. Prej vitesh trajneri aktual i Tiranës konsiderohet si djali i shtëpisë. Ama rrugët shpeshherë në futboll ndahen, por edhe bashkohen. Shehi tani është larg Korçës dhe Skënderbeu larg të qenit i madh, ndërsa fati deshi që këtë fundjavë ishportieri, tani trajner, dhe skuadra juglindore të takohen sërish dhe për 90 minuta do të jenë “armiq”. Si Skënderbeu edhe Tirana e Shehit duan të fitojnë, por në fund mund të buzëqeshë vetëm një prej tyre. Dhe gabimi i njërës palë mund të jetë fatal. Skënderbeun e nxjerr jashtë garës për mbijetesë, ndërsa Tiranën nga gara për titull. Për sa i përket gjendjes së skuadrës, Shehi është shprehur se skuadra është në maksimum, përveç Elton Kalesë, i cili ka shfaqur probleme.
Shehi, përballeni me Skënderbeun, një ekip, i cili ka ditur t’u marrë pikë edhe ekipeve më të mëdha...
Është e vërtetë që është një kundërshtar, i cili këtë javë ka bërë mjaft mirë. Ka marrë pikë dhe mbi të gjitha ka fituar besim, që është shumë i rëndësishëm në futboll. Të jemi të ndërgjegjshëm, na pret një transfertë shumë e fortë dhe shumë e vështirë.
Kale ka pasur dëmtime në shpatull. Do të jetë ai i gatshëm në takimin e Korçës?
Kale ndoshta nuk është në gjendjen e tij më të mirë, për shkak të kësaj nuk e ka nisur me minuta të plota. Megjithatë, është një lojtar që na ndryshon shumë dhe është inteligjent, kur futet e kap shumë mirë situatën dhe atë që kërkojmë e bën shumë mirë.
A është Kale mungesa e vetme e Tiranës përballë kësaj sfide?
Kale është i gatshëm dhe është në listën tonë për sfidën e sotme. Nuk do ta quaja mungesë, por është një vendim që kemi marrë edhe për shkak të situatës ku ndodhemi. Siç e thashë pak më parë, është lojtar që ndryshon shumë kur futet.
Gjendja e skuadrës është më optimalja?
Pjesa tjetër e ekipit është në 100% e vet. Skuadra është stërvitur shumë mirë dhe, falë Zotit, nuk kemi dëmtime apo pezullime këtë javë.
Taipi ka thënë se ne e njohim mirë Shehin…
Mund të më njohin, edhe unë disa lojtarë të paktë në numër i njoh dhe i kam stërvitur. Për pjesën tjetër nuk kam një informacion të saktë përveç atyre që shohim në ndeshje dhe nga programi që kemi për të kuptuar se çfarë bëjnë mirë dhe se si shprehen.
Përpara keni 3 transferta. Është kjo pika më e rëndësishme e sezonit?
Mendoj se në situatën ku jemi çdo ndeshje është e rëndësishme, për shkak të objektivave dhe për shkak të pozicionit ku jemi. Kurrsesi nuk duhet të mendojmë për transfertat që na presin më pas, por do të fokusohemi te takimi me Skënderbeun.
Jeni vetëm 5 pikë larg vendit të parë. A keni shpresa për kampionatin?
Kemi rikuperuar pikë, jemi në pozicionin ku duhet të luftojmë me të gjitha forcat dhe me gjithë kapacitetin që kemi, por do t’i marrim ndeshjet hap pas hapi dhe nuk duhet të mendojmë për vendin e parë. Jemi akoma në vendin e pestë, duhet të ngjitemi dhe të marrim pikë sa më shumë.
Kush e vendos këtë kampionat?
Kemi hyrë në një fazë shumë të rëndësishme të kampionatit. Na ndajnë vetëm 10 finale dhe si të tilla duhet t’i trajtojmë, pastaj në fund do të bëhen llogaritë kush ka gabuar më pak do të jetë më i miri në tabelën e renditjes.