Partizani “stërvitet” me Apoloninë, fiton edhe Elbasani
Kampionati kombëtar i basketbollit për femra ka ngritur ditën e djeshme siparin e javës së 10-të me dy ndeshje. Partizani bëri “formalitetin” ndaj Apolonisë së vendit të fundit duke fituar thellësisht në transfertë, për t’iu bashkangjitur në krye të tabelës me pikë të barabarta Flamurtarit, me vlonjatet që kanë ende nuk kanë zbritur në parket. Takimi i luajtur dje në pallatin e sportit të Vlorës, ashtu sikurse pritej nuk pati shumë histori, për vetë diferencat e jashtëzakonshme që ekzistojnë ndërmjet dy skuadrave. Kryeqytetaset e kthyen në një seancë stërvitore, ndërsa trajnerja Ledina Koçi u dha minuta të gjitha vajzave. Kështu që, në periodën e parë Partizani shpërthen në pikë, për ta fituar këtë fraksion me rezultatin e jashtëzakonshëm 26-4. Miket vijojnë të luajnë me efikasitet të lartë në sulm edhe në periodën e dytë, të në cilën fitojnë 30-11, për të shkuar në pushim me 41 pikë avantazh. Partizani nuk ndalet as në periodën e tretë, të cilën e fiton 22-6, duke kryesuar me 57 pikë, kur kanë mbetur edhe 10 minuta nga fundi. Në periodën e katërt, kryeqytetaset e ulin ritmin. Apolonia e fiton këtë fraksion loje 12-8, ndërsa në shifra të përgjithshme triumfojnë të kuqet 86-33. Në ndeshjen tjetër që u zhvillua dje Elbasani mposhti në fushën e tij Studentin, duke hedhur një hap të rëndësishëm për një vend në zonën “play off”. Një takim me shumë rivalitet, por vendëset u treguan më të sakta dhe morën një sukses të vyer në shifrat 68-62. Një tjetër paraqitje e shkëlqyer për Enisa Qosjen, e cila këtë realizoi 40 pikë duke qenë vendimtare në suksesin e elbasanaseve.
NDESHJET E TJERA - Ditën e sotme Kategoria e Parë e basketbollit për femra do të luajë dy takimet e mbetura të javës së 10-të. Flamurtari kryesues dhe i pamposhtur deri në më tani udhëton drejt kryeqytetit, teksa do të përballet më SHKB Tiranën në pallatin e sportit “Asllan Rusi”. Pas një pjese të parë të vështirë të sezonit SHKB Tirana vjen e përforcuar me dy lojtare serbe, të cilat e kanë rritur ndjeshëm nivelin e skuadrës. Në kryeqytet do të luhet edhe sfida tjetër, me Tiranën që pret në sallën “Farie Hoti” skuadrën e Vllaznisë.