Titulli më pranë, Partizani fiton të parën ndaj Erzenit
Të kuqtë e fillojnë mbarë serinë e finaleve
Ashtu sikurse pritej, akti i parë i serisë së finaleve të kampionatit kombëtar ndërmjet Partizanit rezultoi vërtet spektakolar. Pas në një ndeshjeje që zgjati dy orë e gjysmë, ishte Partizani që festoi në sallën “Feti Borova”, duke bërë hapin e parë drejt titullit. Skuadra e Ylli Tomorrit triumfoi me rezultatin 3-2 në një ndeshje dramatike, të luftuar nga fillimi e deri në fund. Fatkeqësisht këtë spektakël tifozët nuk patën mundësi ta ndiqnin në sallë për shkak se ndeshjet siç dihet luhen pa praninë e publikut prej pandemisë.
NDESHJA – Në setin e parë Partizani shfaqi një lojë të shkëlqyer, duke kryesuar gjatë gjithë kohës. Deliu dirigjon në mënyrë perfekte ndërsa Qepa, Çela dhe Rama tregohen të papërmbajtshëm. Është pikërisht Rama me një bllok që u jep setin e parë “demave” në shifrat 25-15. Seti i dytë nisi më mirë për të besuarit e Sakos, të cilët marrin fillimisht epërsinë 10-5. Por Partizani reagon mjaft mirë dhe kthen gjithçka në favor, ndërsa seti vuloset në favor të kryeqytetasve pas një gjuajtje jashtë të Kulës. Në pushim trajneri Arben Sako “i shkund” të tijtë, duke bërë që lojtarët të futen me tjetër mentalitet në lojë. Megjithatë beteja vijon e fortë, por pas pikëve shtesë Erzeni fiton 26-24, duke i ngushtuar shifrat e seteve në 1-2. Shijakasit marrin zemër dhe paraqiten akoma më mirë në setin e katërt. Me Kulen, Barutin, Çullhajn dhe kapitenin Nazifi miqtë luajnë më qartë dhe e fitojnë setin 2522. Kështu finalja e parë shkon me set final, ku fraksionin i fundit është për “infarkt”, pasi ekipet luftojnë fort në çdo pikë duke bërë që gjithçka të vendoset në pikët shtesë. Partizani tregohet më i saktë, ndërsa pas një gabimi të shijakasve setin mbyllet 17-15 në favor të “demave”, dhe e gjithë ndeshja 3-2. Megjithatë ekipet nuk kanë kohë për të humbur, pasi ditën e nesërme në orën 18:00 do të zbresin përsëri në parket për të zhvilluar finalen e dytë. Këtë herë takimi do të luhet në Durrës, në pallatin e sportit “Ramazan Njala”, ku sërish pritet një luftë e fortë sportive. Kujtojmë që skuadra e cila arrin numrin e tre fitoreve, shpallet kampione e Shqipërisë për edicionin 2021.