Ibraimi, “goal.com” e quan Zola i Kukësit
Paraqitjet e Agim Ibraimit me Kukësin në Shqipëri dhe rikthimi në Kombëtaren e Maqedonisë së Veriut, kanë bërë jehonë edhe në vendin fqinj, në Itali, aty ku provoi të luante një sezon me ekipin e Kaljarit, skuadër ku bëri histori ylli italian, Xhanfranko Zola. Portali prestigjioz “goal.com” i ka kushtuar një shkrim kapitenit të Kukësit, duke theksuar se shtatë vite e gjysmë më vonë nga prezantimi i tij më 14 shtator 2013 te Kaljari, Ibraimi është shënuesi më i mirë i Kategorisë Superiore (shkrim para dopietës së Ezesë), duke arritur të fitojë edhe ekipin kombëtar. Në këtë portal kujtohet një detaj interesant me batutën që lëshoi Ibraimi gjatë prezantimit të tij, duke u veshur me numrin 10, bluzën e Xhanfranko Zolës dhe marrë mbi supe shumë përgjegjësi. “Do të ishte mirë të afrohesha të paktën pak më afër asaj që ai bëri. Xhanfranko ishte një numër i shkëlqyeshëm 10 i Kaljarit. Tani unë jam këtu dhe shpresoj të mbaj lart përgjegjësitë”, shprehej atëherë 33vjeçari, të cilat i risjell “goal.com” në shkrimin dedikuar Ibraimit. Në Itali e konsiderojnë si yllin e Kukësit, i cili arriti të fitonte edhe një sfidë personale, duke qenë se, sipas këtij portali, vinte nga disa vite anonimiteti dhe u rikthye te Kombëtarja pas plot pesë vitesh. “Ishte hakmarrja (e pjesshme) e një personazhi që nuk arriti kurrë të hipte në trenin kryesor. Ose, më saktë: ai e mori atë, por zbriti disa ndalesa më vonë. Kaljari e mori atë nga sllovenët e Mariborit në ditët e fundit të dritares së transferimit të verës 2013, duke e bërë atë lojtarin e tretë maqedonas në historinë e Serisë A pas Pançev dhe Pandev (atëherë Nestorovski dhe Elmas do të mbërrinin gjithashtu)”, shkruan “goal.com”.