Mezani: Gjëja më e mirë e këtij Flamurtari, të rinjtë

Gentjan Mezani “skanon” Flamurtarin. Ish-trajneri mendon se me një projekt konkret dhe të mirëmenduar, klubi mund të rikthehet në elitë. Në një intervistë për “Panorama Sport”, ai cilëson se gjënë më të mirë që klubi ka bërë këtë sezon është angazhimi i të rinjve të akademisë.

Mezani, si mund të ringrihet Flamurtari?

Njerëzit që janë në klub, kanë për detyrë të krijojnë një projekt të mirëmenduar dhe ringritur Flamurtarin ku i takon. Qyteti i Vlorës dhe tifozëria vlonjate meriton një ekip kompetitiv, që konkurron në nivelin më të lartë të futbollit në Shqipëri.

Si e shikoni ecurinë e ekipit në Kategorinë e Parë?

Përbërja e skuadrës, në të cilën bëjnë pjesë shumë lojtarë të rinj, ka bërë që ekipi të ketë ecuri.

Mendoni se do të shmanget ndeshja shtesë apo do të shkojnë drejt “play out”-it?

Shpresoj që jo, sepse do të ishte shumë e vështirë. Presioni do të ishte shumë i madh për lojtarët, të cilët janë pa shumë eksperiencë.

E kanë bërë si duhet të rinjtë detyrën?

Gjëja më e mirë që Flamurtari po bën në këto momente është se po u jep mundësi lojtarëve të rinj që të rriten dhe të zhvillohen si futbollistë. Këta të rinj duhet ta shfrytëzojnë mirë këtë mundësi. Në fund do të shohim se a kanë bërë mirë apo jo, pasi fundi i kampionatit është ai që do të flasë.

A keni pasur oferta, me çfarë po merreni aktualisht?

Momentalisht jam në Vlorë pranë familjes. Kam pasur disa oferta, por nuk kemi rënë dakord.

E mendoni një rikthim te Flamurtari?

Nëse Flamurtari do të ketë një objektiv të qartë, me kënaqësi do të kthehesha.

Si e shihni Gjilanin tani që keni disa kohë larg tij?

Më vjen keq, sepse unë bëra një lëvizje që shpresoja të ishte pozitive duke u larguar nga Gjilani. Por, kjo nuk rezultoi e duhura për skuadrën. Ajo doli nga të gjitha objektivat, por shpresoj që në këtë fund kampionati të bëjë mirë. Gjilani i ka të gjitha mundësitë të nisë ndërtimin e një skuadre kompetitive për vitin e ardhshëm. ERMAL SIKA