Kashami: Nuk mund të bëj “vezë të kuqe”
“Në këto 5 ndeshje do të respektojmë kalendarin”
Historia përsëritet. Jo pak tifozë u çu ditën kur në javën e dytë të këtij sezoni (pas fitores me Pogradecin), presidenti Nexhat Bizhdili shkarkoi Ndriçim Kashamin dhe emëroi Artan Mërgjyshin. Tani që ky i fundit u dorëhoq, kavajasi rikthehet sërish në detyrë. Ai nuk ka humbur kohë dhe ka startuar direkt punën, teksa në fundjavë e pret transferta e vështirë me liqenorët. Tekniku 51-vjeçar nuk mund t’u thoshte “jo” verdhezinjve, ndonëse e ka të qartë se nuk mund të bëjë mrekullinë. Gjatë një deklarate të dhënë enkas për “Panorama Sport”, ai thotë: “Jam kavajas dhe nuk besoj se ndonjë trajner e do Besën më shumë se unë, qoftë edhe jabanxhi. Thënë me troç, e ndiej detyrë që sa herë të më thërrasë qyteti im, t’i them ‘po’.
E dyta, vetë profesioni ynë është shëtitës dhe asnjëherë stabël, qofsh edhe kampion elite, të largojnë sikurse edhe ka ndodhur”.
SYNIMET - Verdhezinjtë tashmë do t’i luajnë “për qejf” 5 ndeshjet e mbetura, pasi vështirë të besojë kush se ka mbetur ndonjë objektiv realisht i arritshëm. Natyrshëm lind pyetja: Atëherë me çfarë synimi Ndriçim Kashami pranoi të merrte Besën për ta drejtuar vetëm për 5 javë? “Nuk e mohoj se në 5 ndeshjet e mbetura, dikush pret që Kashami do të bëjë ‘vezën e kuqe’ e të dalë kampion (qesh). Siç e dini, isha unë që zhvillova fazën përgatitore me ekipin në korrik dhe e drejtova dy javë. Dua të them me këtë se i njoh pothuaj të gjithë futbollistët. Di të dhënat dhe cilësitë pozitive si dhe mangësitë e secilit, përjashto prurjet e janarit. Në kushtet në të cilat mora ekipin, më mbetet vetëm një detyrë, të vëzhgoj me imtësi çfarë gjendjeje gëzon secili nga futbollistët. Më pas t’i rekomandoj presidentit se kush na vlen për sezonin tjetër e kush jo. Ky mbetet qëllimi im kryesor, ndërkohë që do të respektojmë kalendarin e kundërshtarët deri në ndeshjen e fundit”, përfundoi trajneri.