Futboll në Ramazan, flet mjekja: Ja çfarë duhet të bëjnë lojtarët në agjërim
“Futbollistët e kanë të vështirë, duhet regjim ‘smart’”
Jemi në muajin e Rama zanit dhe një pjesë e fu tbollistëve, kanë nisur agjërimin. Pa dashur të hyjmë në pjesën fetare, agjërimi ndikon te rendimenti i futbollistëve. Edhe në Europë, para dy sezonesh, u bë një zhurmë e madhe para finales së Ligës së Kampionëve, me Muhamed Salah që ishte një nga futbollistët që agjëronin dhe gjendja e tij fizike u vu në pikëpyetje. Kjo temë është delikate dhe për këtë arsye, “Panorama Sport” ka kontaktuar me mjeken specialiste, Albana Daka. Nutricionistja ka treguar problemet që shkakton agjërimi sa i takon gjendjes së futbollistëve dhe rendimentit të tyre. Gjithashtu, Daka dha dhe sugjerimet e saj se si futbollistët duhet të agjërojnë, që sipas saj, duhet të ndjekin një dietë “smart” (të zgjuar) dhe duhet të konsumojnë ushqimet e duhura e në mënyrën e duhur.
Doktoreshë, jemi në muajin e Ramazanit dhe ka shumë lojtarë që agjërojnë. Kjo gjë hap diskutime shumë më të gjëra, jo vetëm në Shqipëri. A ndikon në rendimentin e sportistëve mbajtja e agjërimit?
Nuk e di se çfarë regjimesh ushqimore kanë futbollistët, por normalisht duhet të kenë një regjim ushqimor të përcaktuar në rutinë. Nëse ata janë në stërvitje të fortë fizike, krijohet një farë dehidrimi, i cili nuk kompensohet plotësisht gjatë orarit kur lejohet ngrënia. Por e theksoj, gjithçka varet se çfarë regjimi kanë aktualisht, 2 mijë apo 3 mijë kalori, si është rutina ditore, çfarë lloj aktiviteti fizik bëjnë.
Tani jemi në javët e fundit të sezonit dhe vendosen të gjitha verdiktet... Kjo gjë kërkon një sforco më të madhe, si fizike, ashtu dhe mendore. Çfarë do t’u këshillonit lojtarëve që agjërojnë?
Nëse futbollistët bëjnë regjim gjatë Ramazanit, që ne e gjuajmë regjim “smart” (të zgjuar), ata duhet të marrin kaloritë që iu nevojiten e të mos fokusohen në regjimin e brumërave, mishrave etj. E gjitha kjo për shkak se konsumimi i ushqimit është transferuar në kohë gjatë natës, jo gjatë ditës. Duhet të kenë ushqime likuide, qoftë me supat, qoftë me “smoothies”. Nuk e di sa mund të arrijnë futbollistët të stërviten dhe të djersijnë e të mos konsumojnë lëngje.
Kryesisht, stërvitjet janë paradite dhe ndeshjet pasdite. Ky është regjimi i futbollistëve në Shqipëri. Çfarë duhet të bëjnë me këtë rutinë?
Parimi është se ata duhet të marrin sasi të madhe lëngjesh gjatë vakteve. Për mua, duhet ta kenë zero mishin e kuq, dieta e tyre të jetë te proteinat e pulës dhe të peshkut. Të hanë fruta të thata e jo ëmbëlsira gjatë vakteve. Mëngjesi duhet të jetë kos me tërshërë dhe me drithëra. Mbi 70%, ushqimet duhet të jenë të lëngshme. Nuk duhet të marrin lëngje frutash. Ato duhet të merren në formë kokrre. Duhet të kenë një regjim “smart”, pa mish të kuq, pa sallame, pa bulmet. Duhet një regjim i ekuilibruar.
Në Europë, standardet janë më të mira, kanë dhe nutricionistin e klubit që jep këshilla në muajin e Ramazanit. Mendoni se klubet në Shqipëri duhet ta kenë një mjek të tillë ose ndoshta të konsultohen me dikë?
Dikur unë ia kam propozuar dikujt në Federatë që të kenë nutricionist. Ata kanë një mjek të përgjithshëm dhe kaq. Duhet të bëjnë “check-up” sa më shpesh te nutricionisti, që ta dinë se ku janë. Nuk po them të bëhen kontrolle çdo muaj, por të bëhet të paktën një herë në tre muaj. Mendoj se patjetër duhet të kenë një nutricionist. Pastaj mund t’i promovojnë regjimet nutricionale edhe në konferenca për shtyp. Por nuk e kanë promovuar mjaftueshëm këtë gjë. Mendoj se duhet promovuar kjo gjë, pasi është shumë e rëndësishme, jo të kujtohen kur të jetë shumë vonë. Të paktën një herë në tre muaj, duhet të kryejnë “check-up” nutricionist.
A ju ka ndodhur ndonjëherë që pas muajit të Ramazanit, të vijnë futbollistë te ju dhe të shprehin shqetësime?
Patjetër që ka ndodhur. Mënyra e ngrënies nga ana e sportistëve është shumë e gabuar gjatë Ramazanit. Kanë edhe traditën e shtrimit të iftarit dhe e teprojnë në ushqime.
Cili është gabimi që bëjnë më shpesh?
Gabimi që bëjnë më shpesh është konsumi i ëmbëlsirave dhe mishit të kuq. E bëjnë këtë gjë për të marrë proteina, por kjo gjë është shumë e gabuar. Ngrënia bëhet orët e natës dhe metabolizmi është shumë i ngadaltë natën.