“Qeveria s’i lejon tifozët”, Duka skanon futbollin shqiptar në UEFA
Disa vende kanë vendosur që të kthejnë tifozët në stadiume, por kjo gjë është refuzuar në Shqipëri nga qeveria. Këtë e ka konfirmuar në UEFA edhe presidenti i FSHF-SË, Armand Duka. Realiteti, kryesisht në kategoritë e ulëta, tregon se prania e tifozëve është e pashmangshme. Gjatë ditës së djeshme u zhvillua mbledhja e radhës e Komitetit të Stadiumeve dhe Sigurisë në UEFA, mbledhje e zhvilluar përmes videokonferencës, në të cilën mori pjesë edhe presidenti i FSHF-SË Duka, në cilësinë e nënkryetarit të këtij komiteti. Takimi ishte shumë i rëndësishëm, sepse në komitet u bë një panoramë e plotë e situatës së 12 qyteteve ku do të zhvillohet “Euro 2020”, për të parë në detaje se në çfarë faze ndodhet organizimi dhe problematikat e vërejtura deri më tani. Presidenti Duka, njëherësh anëtar i Komitetit Ekzekutiv të UEFA-S, bëri një referim mbi gjendjen aktuale të aktiviteteve futbollistike në vendin tonë, ku theksoi se futbolli në Shqipëri ka qenë aktiv në të gjitha nivelet, përtej pandemisë. Sezonin e shkuar, si pak federata në Europë, FSHF arriti të përmbyllte rregullisht çdo garë kombëtare, si në nivel profesionist ashtu edhe në atë amator. Duka theksoi se ka pasur një përpjekje të vazhdueshme nga Federata e Futbollit për kthimin e tifozëve në stadium, edhe në masën 30%, por këto përpjekje të institucionit të futbollit janë refuzuar nga autoritetet qeveritare. Një pikë tjetër e rendit të ditës së Komitetit të Stadiumeve dhe Sigurisë ishte puna që po bëhet në shumë vende në lidhje me lejimin e tifozëve në stadiume, masat që janë marrë dhe kapacitetet që ka secili shtet. UEFA nga ana e saj është besimplotë se do të ketë prezencë të ndjeshme të tifozëve në “Euro 2020” dhe në fund futbolli do të triumfojë së bashku me lojtarin e 12-të.