.“Tomori të besojë, historia s’blihet me lekë”

Tomori do të sfidojë në takimin e radhës Egnatian kryesuese. Ish-sulmuesi Edmond Gjata, përmes prononcimit për “Panorama Sport”, kërkon nga skuadra dhe stafi drejtues që të luajnë dhe respektojnë garën deri në fund, pasi Tomori është klub me histori. “Historia nuk blihet, ndërsa suksesi i skuadrave të vogla dhe periferike është kalimtar. Ky fakt duhet ta ndërgjegjësojë më shumë skuadrën për t’i shkuar deri në fund misionit, rikthimit në elitë. E kam ndjekur me shumë vëmendje dhe interes ecurinë e Tomorit këtë sezon. Kam vlerësimet më të mira për punën e kryer dhe rezultatet e deritanishme. Vlerësimi shkon për gjithë stafin drejtues dhe futbollistët. Por, puna nuk duhet ndalur këtu. Aq më shumë që pas barazimit me Pogradecin kam konstatuar pesimizëm nga opinioni, por më ka pëlqyer shumë dhe vlerësoj deklaratën e trajnerit Sinella për të vazhduar luftën deri në fund. Këtë mbështetje dua t’i jap edhe unë ekipit para ndeshjes me Egnatian. Deri në fund janë edhe 5 ndeshje për t’u zhvilluar dhe gjithçka është e mundur. Unë i sugjeroj ekipit dhe stafit të luajnë ndeshjet e mbetura me kokën lart dhe të hyjnë në fushë vetëm për fitoren. Ekzistojnë mundësitë për t’u ngjitur në elitë. Stafi drejtues dhe ekipi e dinë se vendi i Tomorit është në Superiore. Duhet kuptuar njëherë e mirë se historia nuk blihet me lekë. Çdo skuadër e vogël dhe periferike sado të investojë, përsëri suksesin e ka momental dhe nuk mund të matet me hijen e rëndë që ka Tomori ynë, fanella e të cilit ka peshë shumë të rëndë. Ndodhi njëherë që Egnatia u fut në Superiore pas dhuratës që i bëri poshtërsisht Naftëtari në dëmin tonë. Ka qenë një përballje në Kuçovë, por tani duhet të bëjmë çmos të mos e pësojmë nga gabimet tona. Mendoj se skuadra dhe stafi i saj duhet të besojnë se do t’ia dalin vetëm për përbërjen dhe historinë që kanë”, u shpreh Edmond Gjata. EDI SPAHIU