Lila: Besa nuk luan për statistikë dhe... ndere

Mesfushori peqinas, Bledar Lila, luan sezonin e dytë radhazi te Besa. Në prononcimin e dhënë për “Panorama Sport”, 20-vjeçari deklaroi se në vijim, skuadra kavajase, edhe pse jashtë objektivave, nuk do t’i luajë ndeshjet e mbetura për statistikë. “U bëra pjesë e Besës, kur skuadra ime e vendlindjes, Shkumbini, luante në Kategorinë e Dytë. Përfshirja në një ekip me emër, traditë e histori si Besa, më dha mundësi për të ndryshuar sado pak karrierën time, ku jam konsideruar si titullar. Peng? Besa në këto dy sezone që luaj unë, ka merituar më shumë. Jo në pak ndeshje na janë mohuar gola të rregullt, na janë mohuar penallti të pastra dhe shpesh jemi ndëshkuar me 11-metërsha të paqenë, si dhe është ndier presioni dhe egërsinë që Kategoria e Parë ka brenda dhe jashtë fushave. Këtu nuk po llogaris çoroditjen që solli pandemia. Ka ndikuar edhe mosha e re e futbollistëve apo një menaxhim më i mirë i merkatos sa i takon përzgjedhjes. Pengu im është që Besa do të konkurrojë edhe vitin tjetër në Kategorinë e Parë. Elita është një ëndërr, që kam përshtypjen se po torturon aktualisht çdo lojtar të Besës. Luhet pa objektiv? Çdokush që mendon kështu, gabon. Atëherë përse do të rikthehej sërish në ekip trajneri Ndriçim Kashami dhe do të largohej trajneri Mërgjyshi. Të jeni të sigurt, dhe kam bindjen e palëkundur, se ne si futbollistë nuk do të futemi në fushë thjesht për t’u bërë ‘ndere’ skuadrave të tjera, duke filluar nga takimi i radhës me Pogradecin në transfertë”, u shpreh Lila për gazetën. FERIZ FERIZAJ