Çapo: Asambleja OK, Duka rol thelbësor në reformimin e KOKSH
Pas deklaratës së bërë nga FSHF-JA ku bëhej thirrje për bojkot të asamblesë dhe akuzave për mënyrën e organizimit të saj, "Panorama Sport" ka kontaktuar me anëtarin e Komitetit Ekzekutiv të KOKSH, Labo Çapo, i cili jep pretendimet dhe shpjegimet tij për të gjithë procesin se si është organizuar asambleja e datës 17 prill. "Po ju jap shpjegimet e mia. Tashmë dihet që Komiteti Olimpik ka qenë tërësisht në anarki juridike dhe organizative. Prej shumë kohësh disa federata olimpike morën iniciativa dhe nisma për riorganizimin juridik dhe organizativ të KOKSH. Dua të theksoj që z.armand Duka, Sait Prizreni dhe disa sporte të tjera olimpike kanë mbajtur peshën kryesore për reformim të institucionit. U miratua statuti i ri duke u mbështetur në Kartën Olimpike dhe ligjet e shtetit Shqiptar. Statuti është sipas standardeve, ku u përcaktuan të drejtat dhe detyrimet për çdo anëtar dhe funksionar të KOKSH. Për asamblenë zgjedhore janë respektuar të gjitha afatet ligjore dhe kohore. Në email-in e ardhur nga KOKSH në datën 19 mars janë përcaktuar dokumentet që duhen për akreditim anëtarësh dhe kandidatët. KVE, në datën 7 prill, u ka dërguar të gjithë federatave mangësitë në dokumentacion. Afati për plotësimin e tyre ishte 5 ditë, e parashikuar dhe në statut. Në këto kushte, federatat kanë plotësuar dokumentacionin e nevojshëm.
Për rastin konkret nuk kam informacione, por dua të theksoj se z.armand Duka ka mbajtur peshën kryesore për reformimin e institucionit të KOKSH.
Ka ardhur momenti që i gjithë komuniteti i sportit të japë kontribut për rregullimin e imazhit të KOKSH dhe për funksionimin normal të këtij institucioni", deklaroi Çapo për "Panorama Sport".