Lëv: Duam çerekfinalen

“Fiton ajo skuadër që do të gabojë më pak, duam të kualifikohemi”

Trajneri i Gjerman isë, Joakim Lëv, është i bindur që ndeshja ndaj Anglisë do të vendoset nga episodet. Ashtu si dhe Sauthgejt, Lëv beson se detajet do të bëjnë diferencën në sfidën e “Wembley”-t.

Sa i druheni Anglisë?

Anglezët janë rritur shumë në këto tri vitet e fundit. Në Kupën e Botës në 2018 ata vërtetuan se janë një nga skuadrat më të mira në botë. Ata kanë lojtarë që luajnë në një nga kampionatet më të fortë për të mos thënë më i forti në Europë, ata janë të shpejtë dhe mund të na godasin në çdo kohë.

Si është gjendja e skuadrës?

Rydiger dhe Gyndoan janë stërvitur dhe kanë ardhur me ne në Londër. Robin Gësens është mirë dhe do të jetë nga minuta e parë. Ai ka qenë një nga lojtarët më të mirë për ne në këtë turne. Shpresoj që dhe ndaj Anglisë ai të jetë në formën e tij më të mirë. Skuadra është gati dhe mendoj që të gjithë që janë në dispozicion, mund të japin kontributin e tyre.

Çfarë ndeshjeje prisni?

Ndeshjet e një niveli të tillë vendosen në rastet më të shumta nga detaje të vogla. Nëse gabon, skuadra kundërshtare mund të shënojë dhe ndeshja mbaron praktikisht aty. Rol të rëndësishëm në sfida të tilla luan dhe ana psikologjike. Duhet të kemi nerva të forta përndryshe mund të kthehemi në shtëpi.

Si është të luash në “Wembley” dhe sa ndikoi fakti që nuk u stërvitët para ndeshjes?

Ishte shumë e rëndësishme që të zhvillonim një seancë këtu në stadium, gjithsesi kjo nuk ndodhi për disa arsye që tani është e kotë që t’i përmendim. Por do të kishte qenë shumë e rëndësishme nëse do ta kishim pasur mundësinë.

Si e keni përgatitur këtë sfidë?

Motivimi është aty dhe kjo është diçka e rëndësishme. Sfida të tilla nuk kanë nevojë për motivim ekstra. Lojtarët mezi presin ndeshje të tilla për të matur forcat. Jemi të vetëdijshëm që nuk kemi qenë të ekuilibruar në disa momente duke humbur përqendrimin, diçka që duhet ë mos ndodhë në sfidën e nesërme (sotme).