Mesi pa kontratë, një ekip yjesh .... në ajër
Nga Donaruma te Ramos, ja më të shtrenjtët që ikin me zero
Lionel Mesi është një fu tbollist pa kontratë. Gjashtë herë fituesi i “Topit të Artë”, nuk e ka nënshkruar ende kontratën e rinovimit me Barcelonën dhe ka jo pak hije dyshimi nëse do ta bëjë ndiçka të tillë apo jo. E habitshme, por një nga lojtarët më të mirë në botë, nga dita e djeshme është një futbollist i lirë. “Transfermarkt” ka ndërtuar formacionin e futbollistëve më të shtrenjtë, në bazë të vlerës së kartonit që figurojnë pa kontratë dhe ende të lirë. Megjithatë, mes kësaj liste ka edhe emra si Donaruma apo Serxho Ramos, të cilët kanë akorde paraprake me PSG-NË dhe pritet vetëm zyrtarizmi i tyre në Paris, apo edhe mbrojtësi i Kombëtares shqiptare Elseid Hysaj.
LIONEL MESI - Argjentina është e përqendruar në Kupën e Amerikës latine, e gjithashtu edhe ylli i saj. “Pleshti” po udhëheq alibicelestët drejt sukseseve njëri pas tjetrit në fazën e grupeve, duke kërkuar që t’i shkojë deri në fund këtij kompeticioni, për të koleksionuar trofe me Argjentinën. Minuta e fundit e datës 30 qershor, ka qenë e fundit që e mbante Mesin të lidhur me Barcelonën. Nga data 1 korrik, argjentinasi është një futbollist i lirë. Në fakt, një nga futbollistët më të mirë në botë dhe me vlerën më të lartë në treg në rast të një transferimi të mundshëm, do të mund të firmoste në cilindo klub pa dashur që të paguhet asnjë monedhë për kartonin e tij, por vetëm kontrata e pagesës vjetore dhe të drejtat e imazhit, bonuset etj. Emrat e klubeve të interesuara kanë qenë të shumtë, ku PSG dhe Mançester Siti kryesojnë listën.
ELSEID HYSAJ - Elseid Hysaj është në të njëjtat kushte si lojtari argjentinas dhe shumë yje të futbollit europian. Mbrojtësi i Kombëtares përfundoi kontratën me Napolin, që e mbajti pjesë të napolitanëve që prej 2 gushtit 2015. Së fundmi, për mbrojtësin e Kombëtares bëhet me dije se Lacio do të jetë skuadra e tij e re, teksa gjatë ditës së sotme mund të ketë vizita
mjekësore, por edhe prezantim. Mirëpo, zyrtarisht, deri në mesnatën e datës 1 korrik, edhe Hysaj ka qenë një futbollist i lirë dhe pa kontratë.
RAMOS & CO - Serxho Ramos dhe Donaruma pritet që të jenë mbrojtësi dhe portieri i PSG-SË për sezonin në vijim,
mirëpo, megjithëse flitet se qendërmbrojtësi spanjoll ka arritur akord si dhe portieri i Italisë ka kryer edhe testet me parisienët, zyrtarisht, ata ende nuk kanë firmosur kontratë. Në bazë të vlerës së kartonit, janë në formacionin më të shtrenjtë të atyre që janë pa kontratë.