Skënderbeu nuk dorëzohet, pret lojtarët e Shkëndijës së Tetovës
Ramadani dhe Zejnullahi, “fiksimet” e korçarëve
Skënderbeu kërkon që ta ketë ekipin gati deri më 15 korrik, ditë që do të nisin përgatitjet. Migen Memelli ua ka bërë të qartë drejtuesve se cilat janë repartet ku kanë nevojë për përforcime dhe klubi i është futur me “kokë” negociatave. Fokusi momentalisht është vënë te vija e parë, atje ku në dispozicion janë vetëm Mensah, Pusi dhe Berisha. Tre lojtarë janë shumë pak për të përballur një sezon të tërë, ndaj edhe bardhekuqtë po nxitojnë. Duke qenë se u ka rezultuar e suksesshme “skema” e marrjes së futbollistëve nga Shkëndija e Tetovës, korçarët duan ta vazhdojnë traditën. Këtë herë presin të “peshkojnë” në formë huazimi një mesfushor dhe për një sulmues të fshehur.
FLORENT RAMADANI
- 20vjeçari shqiptar ka spikatur sezonin e fundit me paraqitjet e tij te Shkëndija, edhe pse minutat i kanë pasur të reduktuara. Ai është hedhur në fushë nga trajneri Ernest Gjoka 822 minuta gjatë sezonit 2020-2021, ndërsa ka mundur të realizojë 2 gola. Florent Ramadani luan gjithashtu me moshat e Maqedonisë së Veriut dhe dallohet si një mesfushor mjaft i lëvizshëm që shkel çdo centimetër të fushës. Me ardhjen e tij, Skënderbeu kërkon të mbushë boshllëkun e lënë nga Shqiprim Taipin në këtë repartin, ndaj kontaktet mes palëve kanë nisur dhe me shumë mundësi i riu do huazohet në Korçë për sezonin e ardhshëm.
ARBIN ZEJNULLAHI
- I dyti është gjithashtu një talent i Shkëndijës së Tetovës. Fjala është për Arbin Zejnullahin, 22-vjecarin i cili luan si sulmues i dytë. Ai cilësohet si një lojtar me perspektivë te Shkëndija dhe trajneri Ernest Gjoka e ka për zemër, madje duke i dhënë edhe shpesh hapësira në formacion. Ai do ta forconte ndjeshëm repartin e sulmit te Skënderbeu dhe bashkë me Mensahun, Pusin dhe Berishën do të kompletonin kështu vijën e parë. LLAZI SARO