Shiroki Brijeg mundet para syve të drejtorit Djarmati
Shiroki Brijeg është kundërshtari i Vllazninë në Europë. Afërsia gjeografike ka bërë që drejtori sportiv, Matko Djarmati, të udhëtojë drejt Bosnjës për të ndjekur nga afër rivalët në një ndeshje miqësore. Djarmati ka qenë prezent në testin mes Shiroki Brijeg dhe Velezh Mostar, takim të cilin rivalët e Vllazninsë e humbën në shifrat 2-0. Përpos humbjes që pësoi Shiroki para syve të tij, Djarmati mendon se bëhet fjalë për një rival të vështirë dhe për një ekip cilësor. “Shirokin e pashë nga afër në miqësore. Përpos rezultatit final, jam i bindur se janë ekip i mirë dhe kanë një trajner të zotin. Taktikisht janë shumë të disiplinuar. Janë të shpejtë në tranzicion dhe rrinë mbrapa me 10 lojtarë. Është ndryshe kur e shikon një ekip nga televizori dhe ndryshe kur e shikon drejtpërdrejt nga afër”, u shpreh Djarmati pas kthimit nga misioni i “spiunazhit” në Bosnjë.
- Shiroki Brijeg e nisi miqësoren me Velezh Mostar me këtë formacion: Mishkiç, Mediç, Musa, Juriç, Brekalo, Staniç, Begiç, Vukoja, Ikiç, Jurilj, Lukiç. Pjesa e parë u mbyll 0-0 dhe Shiroki u duk disi më mirë se kundërshtari.
TAKIMI
Ndërsa në pjesën e dytë, nisur edhe nga zëvendësimet, loja e rivalëve të Vllaznisë ra, ku edhe pësuan dy gola, të parin në minutën e 72-të dhe të dytin në të 89-ën. Përpos disfatës, trajneri i Shirokit, ka mbetur i kënaqur nga ekipi i tij, kryesisht nga pjesa e parë. “Ishte një paraqitje solide nga ana e ekipit tim. Sa i përket aktivizimit kishim planifikuar mënyrën e shpërndarjes së minutave që do të luanin lojtarët në këtë takim, duke u dhënë atyre mundësinë për t’i parë në kushte loje. Dikush luajti një pjesë loje, disa një orë, dhe të tjerë në 30 minutat e fundit. Më duhet të theksoj jam i kënaqur me lojën e skuadrën që pjesën e parë të ndeshjes. Në një të tretat e fundit të takimit Velesh Mostar ishte objektivisht më i mirë. Por, nuk kam asgjë për të fajësuar lojtarët e mi. Për shumë prej tyre kjo ishte ndeshja e parë dhe kishte gabime teknike. Në fund të fundit, nuk është kurrë bukur të humbasësh, por është më mirë të humbasësh tani. Ne vazhdojmë të punojmë dhe të përgatitemi për sezonin e ri”, tha trajneri i Shiroki Brijeg, Toni Karaçiç pas humbjes në ndeshjen e parë përgatitore që u zhvillua para syve të drejtorit sportiv të Vllaznisë, Matko Djarmati.