Ramos: Spanja e atyre viteve nuk vjen më kurrë në futboll
Serxho Ramos është mungesa më e madhe e Spanjës në Europianin 2020. Kapiteni legjendar është rishfaqur sërish në skenë, këtë herë duke folur për UEFA-N dhe duke kujtuar finalen e madhe të vitit 2012 pikërisht ndaj Italisë. Spanja ishte një kombëtare që bënte histori në futbollin e atyre viteve dhe një kujtim të bukur e pati pikërisht ndaj Italisë në Kiev duke fituar 4-0. Kjo ndeshje i vuri vulën një epoke të lavdishme me 2 Europianë dhe 1 Botëror.
“Ne e kishim gjithçka në mendje përpara kësaj finaleje. E dinim që ishim një skuadër që do të bënte epokë dhe histori. Por, gjithashtu e dinim edhe vështirësinë për të triumfuar ndaj një skuadre të fortë. Ne vinim nga fitorja e një Europiani dhe një Botërori dhe kurrë nuk është e lehtë të ruash ritmin. Ajo që bëmë ne ishte historike dhe askush nuk do të ketë fatin ta bëjë sërish”, tha Serxho Ramos. ITALIA - Nëntë vite më vonë, Ramos kujton me detaje atë finale dhe përgatitjen e trajnerit Visente del Boske. “Visente ishte shumë i fiksuar me ekipin kundërshtar. Nuk u mor me një futbollist në veçanti sepse në atë Itali luanin futbollistë të rëndësishëm si Pirlo, Kasano dhe Baloteli që ishte i ri dhe në një formë të jashtëzakonshme”, tha fillimisht kapiteni spanjoll.
AI vlerësoi maksimalisht “Axurrët” dhe tha se gjithmonë luajnë në nivele të larta. “Italianët kanë shumë eksperiencë në këto nivele. Dinë të luajnë mirë dhe i menaxhojnë ashtu siç duhet detajet. Të luaje një finale kundër Italisë ishte një hap i madh. E kujtoj momentin kur Fabregas hodhi topin për Silvën dhe ai e goditi me kokë. Pavarësisht se është i shkurtër, gjithmonë i thosha që godet mirë me kokë. Alba nuk ndalet kurrë së vrapuari si në mbrojtje ashtu edhe në sulm dhe na çoi me rezultatin 2-0. Ne e morëm kontrollin e ndeshjes dhe treguam identitetin tonë. Në fakt dukej si një fitore shumë e lehtë, por pas saj kishte sforco, dedikim, punë dhe profesionalizëm. Ishim një skuadër e jashtëzakonshme në atë kohë. Kishte shumë kampionë dhe kuptoheshim lehtësisht me njëritjetrin. Jam krenar që kam qenë pjesë e këtij ekipi që do të mbahet mend gjatë në historinë e futbollit”, përfundoi kapiteni Ramos.