Bajko: Reja, eksperimente pa rezultat në Kombëtare
“Petkoviç më ka surprizuar, ja sekretet për forcën e Italisë”
Neptun Bajko, legjenda e Partiza nit si dhe ish-trajneri i Kombëtares shqiptare, ishte i ftuari special në emisionin “Euromania” të moderatores Enxhi Biba, në “News 24”. Një mjeshtër i vërtetë që ka shkruar historinë në futbollin shqiptar, Bajko bëri një analizë speciale për ecurinë e deritanishme të Europianit, si dhe foli me nostalgji për eksperiencën në stolin e Kombëtares. Gjithashtu, komentoi edhe situatën aktuale në kampin kuqezi.
“EURO 2020” - “Rëndësi ka që vlerat e një lojtari apo të një ekipi të dalin në pah sa më mirë. Duhet që përgatitja e tyre të jetë në nivele të larta. Disa ekipe kanë pasur mangësi. Vlerat, shpeshherë, i shikojmë në aspektet sulmuese, por sulmi më i mirë është mbrojtja. Në këtë Europian më ka rënë në sy se ekipet që kanë pasur vëmendjen të sulmuesit, kanë dështuar: ekipe si Belgjika dhe Polonia. Mbrojtësit kanë marrë masat, duke ditur pluset dhe minuset e çdo lojtari”.
ITALIA E MANÇINIT – “Italia nuk ka një bomber të mirëfilltë dhe e kryen shumë më mirë rolin e goditjes së portës. Futbolli po pëson ndryshime. Ka shumë rëndësi mënyra e lojës në grup. Dëshira për fitore dhe sakrifica gjithashtu ndikojnë. Kur zbatohen detyrat, pasqyrohen më mirë vlerat. Në këto 3 elemente, Italia është e para që vlerësohet. Duket puna e trajnerit, duke ditur se ku do të mbërrijë. Kjo është shumë e rëndësishme për një ekip kombëtar, se ku do të mbërrijë. Italia ka një anë psikologjike që rrallë e kanë ekipet e tjera”.
FRANCA – “Në ekipin francez kam parë lojtarë që luanin me cilësitë e tyre, bënin sikur komandonin lojën. Mirëpo, ato nuk shkriheshin në lojën e ekipit, pa vënë shpirtin. Ky Europian tregon që shpirti fiton gjithmonë. Në futboll asnjëherë nuk duhen nënvlerësuar forcat e kundërshtarit”.
FUTBOLLI SHQIPTAR – “Futbolli ynë ndër vite ka dhënë gjëra me vlera të mëdha. Që të ndeshesh me ekipet e mëdha, në nivelin që kishim ne në përgjithësi, pa të kaluar nuk ka të tashme. Si dhe pa të tashme, nuk ka të ardhme. Ato vlera i kanë shërbyer këtij vendi dhe mbi to janë ngritur bazat e së tashmes”. NDESHJET E MËDHA ME KOMBËTAREN – “Me gjithë mend kanë qenë ndeshje të mëdha. Ka qenë minuta e fundit, kur Ledio Pano do të bënte goditjen e dënimit nga 25 metra, të cilën gishtat e Këpkes e dërguan në traversë. Në qoftë se do ishte bërë ai gol, 75 milionë gjermaneve do t’u binte të fikët. Më tej, goli i Rrakllit në Gjermani ishte i veçantë. Kemi luajtur edhe për dinjitet, edhe për krenari kombëtare. Në këtë 10-vjeçar të fundit, nuk duhet t’i mohohen vlerat një trajneri shqiptar. Presionet, ngacmimet, ndërhyrjet e ndryshme janë të papërballueshme në ambientin shqiptar. Nuk jam dakord që në këto 15 vite të mos i jepet mundësi një trajneri shqiptar në Kombëtare”.
TRAJNERI REJA – “Nuk jam dakord me Rejën, pasi nuk po arrin dot të stabilizojë formacionin. Ne akoma nuk e kemi të qartë si do të luajmë. Në qoftë se nuk vihen objektiva të qartë, eksperimentet mund t’i bëjë edhe një tjetër, akoma më mirë. Ekipi kombëtar duhet të luajë mirë, të pasqyrojë vlera kombëtare dhe të marrë rezultate”.
KOMBËTARJA SOT – “Unë nuk i di objektivat e ardhshëm të Kombëtares. Unë nuk i di, as i kam lexuar, pasi mund t’i kenë në mendje ata, por futbolli është i hapur dhe nuk surprizohesh dot kollaj. I bie të ngelemi aty ku jemi. Çdo skemë është e mirë, por në varësi të lojtarëve që ke në dispozicion. Nuk mund të përballohen dot me një grumbullim 1-javor ekipet e tjera për të marrë maksimumin”.
MBROJTJA NË EUROPIAN – “Në qendër të mbrojtjes në këtë Europian janë lojtarët me eksperiencë. Nuk jam tifoz me Italinë dhe nuk më ka pëlqyer futbolli italian, por kam mësuar nga futbolli italian se si duhet t’i përballojë kundërshtarët”.
ITALIA – “Zhorzhinjo di një gjë më mirë se të tjerët, që topi është më i shpejtë se lojtari. Është shumë i shpejtë me topin dhe di ku të pasojë. Ai është shumë i zgjuar. Mund të kesh shpirt sa të duash, mund të duash të çash malin, por nëse nuk ke përgatitje fizike dhe taktike, nuk bën dot asgjë. Duket në pamje të parë se është shumë e lehtë, një tifoz e bën shumë mirë nga televizori, por ai që vendos është trajneri dhe grupi i tij. Shpeshherë vendos stoli për arritjen e një rezultati pozitiv. Ka futbollistë që hyjnë dhe ngrenë ritmin e lojës”.
PETKOVIÇ – “Më ka bërë përshtypje trajneri i Zvicrës, Petkoviç, i cili e ka drejtuar ekipin në mënyrë profesionale dhe ndërrimet i ka bërë në momentin e duhur, në vendin e duhur me lojtarin e duhur, prandaj nuk ra niveli i Zvicrës. Më ka befasuar shumë, sepse jemi të etur për të parë një futboll të ndershëm. Kur mbaron ndeshja, duhet të jemi të entuziazmuar ose të pezmatuar, por jo të zhgënjyer”.
NDESHJET E “EURO 2020” – “Të gjitha ndeshjet janë bërë me nivel shumë të mirë dhe të kënaqshëm. Futbolli ka një të mirë, sepse të vlerëson gjatë 90 minutave dhe jo se çfarë thonë shtypi dhe analistët. Në këtë aspekt, Italia tregoi futboll ndryshe dhe tregoi që edhe me djem të rinj që kanë dëshirë për t’u rritur, me futbollistë që luajnë dhe te Sasuolo dhe Atalanta (sepse ishte mbytur kombëtarja me lojtarë të Interit, Milanit dhe Juventusit), mund t’ia dalësh. Futbolli ka nevojë për raste si të Imobiles, por jo nga ato që të prishin imazhin e lojës. Ka nga këto truket që prishin futbollin, italianët janë mjeshtra”, ka deklaruar Neptun Bajko në “Euromania”, emisioni me moderatoren Enxhi Biba, në “News 24”.
“Nuk jam dakord me Rejën, pasi nuk po arrin dot të stabilizojë formacionin. Ne akoma nuk e kemi të qartë si do të luajmë. Në qoftë se nuk vihen objektiva të qartë, eksperimentet mund t’i bëjë edhe një tjetër, akoma më mirë. Ekipi kombëtar duhet të luajë mirë, të pasqyrojë vlera kombëtare dhe të marrë rezultate”.