FLAMURTARI Ribaj në pikëpyetje, klubi me sytë nga Këshilli Bashkiak
Andi Ribaj në dilemë për të ardhmen. Kapiteni ka publikuar orët e fundit një foto në rrjetet sociale dhe si diçiturë kishte zgjedhur një pikëpyetje. Se çfarë ka dashur të shprehë fieraku, kjo është e paqartë, por kanë qenë nga më të ndryshmet komentet që janë bërë nga shokë të tij, tifozë, por edhe përfaqësues të klubit të futbollit Flamurtari. Një prej komentuesve është edhe Ditmar Bicaj, i cili ka luajtur në Vlorë dhe nuk heziton t’i japë një këshillë: “Unë jam për jo, të tjerat i di vetë ti”. Ndërsa të tjerë presin që sulmuesi të mos largohet: “Vazhdo me atë 10 krenarie se kur të mbarojë karriera e futbollistit, do kujtohesh nga vlonjatët si simbol që dhe gjithçka për Flamurtarin”. Se si do të veprojë 31-vjeçari, do të zbulohet vetëm në ditët e ardhshme.
MBLEDHJA - Në Vlorë gjërat janë në ajër. Privatizimi nuk po ecën siç duhet dhe Bashkia Vlorë do të jetë e detyruar që ta marrë vetë në administrim klubin, gjithnjë nëse nuk realizohet ky proces. “Panorama Sport” mëson se është duke u diskutuar që të zhvillohet një mbledhje e Këshillit Bashkiak për Flamurtarin brenda këtij muaji. Gjasat janë që të caktohet një datë deri në 15 korrik. Plot 4 mbledhje kanë dështuar, pasi Dritan Leli kërkonte që mbledhjet të zhvilloheshin “online”, ndërsa këshilltarët në sallë. Duke qenë se nga 1 korriku ka hyrë në fuqi zbutja e masave kufizuese ANTI-COVID, kryebashkiaku mund të paraqitet fizikisht. Administrata e bashkisë pritet që në të mbledhje të japë llogari edhe për Flamurtarin se në çfarë faze është privatizimi dhe se cila do të jetë zgjidhja reale për të shpëtuar ekipin legjendar që sot lëngon. ERMAL SIKA