Trajner e merkato, Hysi: Ja plani
“Kristidhi i konfirmuar dhe Xhumba tek akademia. Ruajmë 80% të grupit dhe bëjmë 3 përforcime”
AF Luftëtari i ka ide të të qarta për se zonin 2021-2022: do të tentojë ngjitjen direkt në Kategorinë e Parë. Trajner do vazhdojë Fotis Kristidhi, ndërsa ndihmës kanë emëruar Petraq Meçin. Është administratori Mustafa Hysi që shpalos planin e gjirokastritëve, gjatë një prononcimi të dhënë për “Panorama Sport”. “Nisëm një rrugë të gjatë, të vështirë dhe plot labirinte. Gjithsesi, ia dolëm dhe AF Luftëtari u ngjit në Kategorinë e Dytë. Për të qenë i sinqertë me ju dhe jo vetëm, mendoj se kemi hedhur vetëm një hap të vogël. Energjitë individuale s’më mungojnë dhe e njëjta gjë vlen edhe për bashkëpunëtorët e mi. Ndaj, besoj te përmbushja e misionit të radhës. Që objektivi të konkretizohet, duke nisur nga kryetari i bashkisë Flamur Golemi e të tjerët me radhë, kemi nisur nga puna për riorganizimin e AF Luftëtarit. Punën do ta çojnë më tej Fotis Kristidhi dhe Petraq Meçi. E mësuat kështu edhe emrin e ndihmësit e trajnerit”, u shpreh fillimisht numri një i klubit. MERKATO
Skuadra do të ruajë pjesën dërrmuese të organikës që u aktivizua vjet në të Tretën, por nuk do të mungojnë as afrimet. Hysi sqaron se kanë nisur bisedime dhe shpejt do të ketë akorde. “Kam qenë dhe mbetem ‘partizan’ i organikës me lojtarë vendës. Prioritet do të jetë ruajtja e grupit në masën 75-80%, pasi ishin ata që bënë të mundur ngjitjen në Kategorinë e Dytë. Mendoj se eksperienca e tyre do jetë dhe çelësi i suksesit tonë në vazhdimësi. Por, kjo nuk do të thotë që nuk do të bëjmë afrime. Tashmë misioni do të jetë edhe më i vështirë, ndaj ne do t’i marrim që të gjitha masat e nevojshme. Jemi në tratativa me dy-tre futbollistë të tjerë, emrat e të cilëve nuk do të ishte mirë t’i bënim të ditur para kohe. E sigurt është se merkatoja e AF Luftëtarit do të jetë cilësore dhe efikase”, nënvizoi administratori. AKADEMIA
Nuk kishte si të mos fliste për grup-moshat, ndërsa paralajmëron edhe ndryshime. Numri një i klubit zbulon edhe përgjegjësin e ri të akademisë, i cili do të jetë Altin Xhumba. “Në momentin që m’u besua ky pozicion nga kryebashkiaku, i kam mëshuar fort një filozofie. Asnjë prind nuk ka detyrim të nxjerrë nga xhepi i tij lekë për stërvitjen e fëmijës me moshat zinxhir. Këtë plan do kemi për vazhdimësinë. Gjithsesi, kjo nuk do të thotë se s’do të ketë një kuotë minimale për lojtarët që do stërviten me moshat zinxhir. Kurrsesi nuk do të ketë abuzime. Me përgjegjësin e akademisë së AF Luftëtarit, Altin Xhumbën, jemi duke punuar për riorganizimin e kësaj strukture. Do të ketë lëvizje trajnerësh brenda grup-moshave nga U-13 deri te U-19. Natyrisht, gjithçka do të realizohet në kohën dhe në momentin e duhur”, përfundoi Hysi.