Meksi do të prishë kontratën, Takaj kërkon 60 mijë euro për ta lënë të lirë
Kapiteni ka tri oferta, e duan kryeqytetaset, te korçarët firmos shkodrani Nikaj
Jorgo Meksi dhe Skënderbeu mund të ndahen para nisjes së fazës përgatitore. Pavarësisht se kapiteni i bardhekuqve ka një kontratë të vlefshme me bardhekuqtë duket se po joshet së tepërmi nga ofertat që kanë ardhur në drejtim të tij. Në të tilla kushte mbrojtësi i krahut të djathtë të korçarëve kërkon të shohë si të mundshme një destinacion të ri duke gjetur gjuhën e bashkëpunimit me korçarët. Nëse Meksi ka qenë një nga lojtarët më konstantë për Skënderbeun në dy sezonet e fundit kjo ka sjellë edhe interesimin e disa ekipeve për korçaro-vlonjatin e
bardhekuqve. Në kushtet kur tashmë edhe interesimet janë bërë të shumta, Meksi ka filluar të reflektojë për një tjetër destinacion që ndoshta mund të jetë shumë më i vlefshëm për të. Kjo merkato ka sjellë veç të tjerash oferta të shumta për mbrojtësin e Skënderbeut.
Kapiteni i korçarëve veç tri ofertave nga Shqipëria, mes të cilëve edhe Partizani e Dinamo, duket se ka një ofertë konkrete nga Greqia. Ofertë e cila dukshëm tundon vetë lojtarin që kërkon ta shfrytëzojë si një mundësi e mirë për t’i dhënë më shumë hov karrierës së tij. Në këto kushte, Meksi ka kërkuar nga Skënderbeu mundësinë e zgjidhjes së kontratës në mënyrë konsensuale, por drejtuesit e Skënderbeut nuk duan të privohen nga një prej lojtarëve më të rëndësishëm të sezoneve të fundit. Në këto kushte, duket se nga sa raportohet, presidenti Takaj i ka kërkuar lojtarit 60 mijë euro për kartonin e tij, me qëllim që ai të vazhdojë karrierën atje ku dëshiron. Këtu duket se palët janë larg, por mbetet për t’u parë se si do të përfundojë seriali “Meksi” te Skënderbeu.
Veç problemeve me largimet, nga ekipi korçarët duket se kanë vendosur të bëjnë afrimet për të ardhmen edhe për këtë sezon. Ardit Nikaj, sulmuesi Shkodran i Vllaznisë, duket se është afrimi më i ri i Skënderbeut. Në fakt, korçarët kishin javë që ishin pas lojtarit, futbollist të cilin Memelli e kishte në listën e dëshirave. Pasi nuk arriti akordin me Vllazninë, Skënderbeu arriti të përfitonte duke mbyllur bisedimet. Nikaj bëhet kështu lojtari më i ri i Skënderbeut, teksa firmos një kontratë trevjeçare me korçarët.