Horner: Në F1 s’ka vend për simulime si në futboll
“Ndëshkimet, të ashpra dhe kundër filozofisë ‘le të garojnë’”
Shumë tifozë e analistë të dielën ishin të pa kënaqur. Pikërisht për mënyrën se si Lando Norrisit dhe Serxho Perezit iu dhanë dënime sepse ata shtynë kundërshtarët jashtë piste, teksa luftonin për një pozicion në renditje gjatë garës së Austrisë. Norris u gjykua fajtor pasi shtyu jashtë piste Perezin në kthesën 4 gjatë fillimit të garës, ndërsa Perez u përfshi në mesin e garës në një incident të dyfishtë me Sharl Lëklerk të Ferrarit. Sanksionet duket se kanë shkuar kundër filozofisë së deritanishme “le të garojnë” me të cilën F1 ka operuar për një kohë të gjatë. Bosi i Red Bullit, Kristian Horner, është i shqetësuar se këto dënime mund të kthehen në një precedent të keq për këtë sport. Ai thotë se është jetike që mënyra e dhënies së dënimeve në Austri të mos hapë derën për pilotët, të cilët të mendojnë se mënyra më e lehtë për të mposhtur rivalët tani është të nxjerrin makinën e kundërshtarit nga pista me manovra që asnjëherë nuk quhen të rrezikshme. “Asnjë nuk do ekuivalentin e simulimit të futbollistëve në fushën e lojës”, tha Horner, i cili mendon se asnjë nga tri incidentet e Austrisë nuk ishte i denjë për ndëshkim. “Mendoj se duhet ta shmangim këtë lloj ndëshkimi. Është tepër e vështirë, sepse ne flasim për këto gjëra shumë shpesh. Është e vështirë për drejtorin e garës, por unë ndjeva që ndoshta incidentet që ne pamë mund të konsideroheshin më shumë përplasje gare sesa të meritonin dënime”, tha Horner. Ky i fundit u shpreh se është pranuar prej kohësh se pilotët, të cilët përpiqen të lëvizin përreth një rivali (dalin anash në pjesën e jashtme), e vendosin veten në mëshirën e makinës që është në pjesën e brendshme. “Incidenti midis ‘Kekos’ dhe Landos
ishte incident gare. Nëse je në pjesën e jashtme, rrezikon dhe nuk mund të jesh në gjendje të qëndrosh përpara. Mendoj se FIA, pasi ka dhënë atë penallti (të parën), ishte e detyruar të jepte edhe ndëshkimin e dytë për një veprim të ngjashëm. Këta djem kanë garuar në
‘karting’ që kur ishin fëmijë dhe e dinë nëse hyn nga jashtë, rrezikon të dalësh nga pista, veçanërisht nëse nuk je përpara. Ndëshkimet ishin pak të ashpra dhe kundër filozofisë ‘le të garojnë’ që ne kemi në kampionat vitet e fundit”, tha Horner.