Dinamo akord me Demirin, Kukësi merr një malazez
Dëshira e madhe e kryeqytetasve është braziliani i Vllaznisë
Transferimi i Besir Demirit te Dinamo duket punë e kryer. “Panorama Sport” zbulon ekskluzivisht se klubi blu ka arritur marrëveshjen me mbrojtësin e majtë dhe pritet që gjithçka të zyrtarizohet në orët në vijim. Ashtu siç ka raportuar edhe në ditët e kaluar gazeta, drejtuesit dinamovitë i kanë bërë një ofertë konkrete mbrojtësit të majtë që mbylli sezonin me Kukësin. Demiri është një lojtar polivalent, pasi përveç repartit difensiv, mund të luajë edhe në rolin e mesfushorit shkatërrues, prandaj trajneri Bledi Shkëmbi ka insistuar që 26-vjeçari të bëhet pjesë e bluve. Eksperienca e tij me skuadra jashtë Shqipërisë si Mariupol në Ukrainë apo Zilina në Sllovaki, do t’i vijë në ndihmë Dinamos për ekipin që Shkëmbi ka projektuar në sezonin e ri. Sipas të gjitha gjasave, Demiri preferohet nga trajneri në rolin e mesfushorit përpara mbrojtjes, aty ku me Kukësin lojtari është aktivizuar në disa ndeshje gjatë sezonit të fundit. Në lojë për futbollistin e lindur në Shkup ishte edhe Tirana, por me sa duket oferta e bluve ka joshur Demirin dhe tashmë pritet vetëm zyrtarizimi.
AGIM IBRAIMI - Një goditje e madhe e Dinamos pritet të jetë padyshim Agim Ibraimi. Fantazisti 32-vjeçar që mbylli sezonin si kapiten i Kukësit, duke shënuar plot 15 gola me fanellën e verilindorëve në kampionatin e fundit, ka marrë një ofertë zyrtare nga blutë e kryeqytetit. Fakti që edhe Demiri është bindur për të firmosur me Dinamon, e bën edhe më të lehtë afrimin e Ibraimit. Ky i fundit vlerësohet si një prej lojtarëve më të paguar në kampionatin shqiptar, prandaj dhe drejtuesit blu kanë menduar të bëjnë një sakrificë për të bindur tetovarin. Ashtu si Demiri, edhe Ibraimi është lojtar i lirë, pasi i ka përfunduar kontrata me Kukësin dhe tashmë e ka në dorë vetë të ardhmen e tij.
PËLQEHET DA SILVA Dëshira e madhe e Dinamos është Viktor da Silva. Fantazisti i Vllaznisë pëlqehet nga blutë dhe trajneri Shkëmbi mësohet se e shikon si një prej lojtarëve që mund t’i bëjë shumë punë formacionit blu. Megjithatë, braziliani është pjesë e Vllaznisë dhe nuk ka ende garanci nëse do të largohet nga Shkodra. Ai është nën kontratë edhe për një sezon,
por duket se te Dinamo duan të bindin me çdo kusht mesfushorin me tipare sulmuese. Nga Vllaznia është afruar zyrtarisht te dinamovitët mbrojtësi i majtë, Aleksandar Isaevski, ndërsa pas përfundimit të angazhimit në Europë, do të vijë edhe Eni Imami.