Fitoi futbolli “mançinian”, Italia na habiti të gjithëve
Urime të gjithëve! Bëmë futbollin e predikuar nga Mançini dhe fituam Europianin. Të gjithë u treguan madhështorë, por Donaruma ishte gjigant dhe më duket i destinuar për t’u bërë ndër më të mirët në botë. Kam një jetë në këtë sport, por të dielën ndjeva drithërima.
Vuajtëm vetëm në minutat e para. E pësuam shumë shpejt golin, por u munduam të futemi në lojë pavarësisht se u përfshimë konkretisht vetëm në fundin e pjesës së parë. Që nga fraksioni i dytë rritja jonë ishte e dukshme. E mbyllëm Anglinë në gjysmëfushën e saj, e dominuam atë, e nuk e lejuam kurrë të bëhej e rrezikshme. Një performancë mbresëlënëse, e kryer me autoritet e për më tepër në shtëpinë e tyre. Gjithçka me guxim dhe inteligjencë pa hequr dorë nga taktika që na ka dalluar gjithmonë. Mund dhe duhet ta kishim mbyllur bisedën me lojë, por edhe nga pika e bardhë nuk duket keq.
VLERËSIM TEKNIK - Më pëlqeu shumë larmia e zgjidhjeve taktike që ofruam në turne. Zakonisht, një trajner e nis dhe e përfundon njëlloj, por mua më duket bukur edhe me alternativa. Besnikë të lojës tonë u munduam që me korrigjime të vogla të nxirrnin nga gjeometritë rivalin. Skuadra tregoi zotësi dhe zgjidhje të shumta brenda së njëjtës ndeshje. Jo vetëm ndaj Anglisë, por gjatë gjithë Europianit. Kjo do të thotë që kemi bagazh, e madje të kompletuar, sepse futbolli përbëhet nga pasuri e ideve dhe skenarët e ndryshëm. Italia ishte cilësore, por lart ishin edhe dy gjysmëfinalistet e tjera: Spanja dhe Danimarka. Zvicra më habiti, por jo Petkoviçi i cili gjithmonë ka punuar mirë. Duke luajtur në një grup të vështirë, Xhaka me shokë bënë figurën e tyre dinjitoze.
ZHGËNJIMET - Franca më ka habitur negativisht, ashtu si edhe Portugalia që vinte si kampionë në fuqi. Edhe Gjermaninë do ta qortojë, por kanë justifikimin se u përballën me Anglinë në momentin e saj më të mirë. Duke u rikthyer te Franca, mendoj se paguan mediokritetin e paraqitjeve të Mbapesë. Benzema e bëri detyrën, ndërkohë që Belgjikën e lehtëson fakti që u përball me Italinë, e cila na habiti edhe ne italianët e jo më të tjerët.
LOJTARË NË VITRINË – Meritojnë vëmendje shumë djem, por do të veçoja Olmon e Pedrin, pa harruar Lokatelin që mundet vetëm të përmirësohet. Saka m’u duk fantastik, por nëse duhet të veçoj dikë, atëherë zgjedh Damsgardin. Vetëm 21 vjeç dhe zëvendësoi pa problem një lojtar ikonik si Erikseni. Vërtet e kam pasur te Sampdoria, por betohem që nuk ka hatër në vlerësimin tim.
ARBITRAT – Nevojitej më tepër ndërhyrje nga VAR-I në disa raste, sepse nëse e kemi teknologjinë, ka një arsye që është ajo e pakësimit të gabimeve. Në tërësi, gjithsesi, do të thoja se Europiani ka qenë korrekt dhe lojtarët i kanë ndihmuar arbitrat. Nuk më duket e paktë, sepse një turne i tillë meriton sjellje të përshtatshme nga ana e të gjithëve.
FORMULA E TURNEUT - Nuk më pëlqente harta e udhëtimeve. Ka ekipe që kanë udhëtuar më shumë, të tjerët më pak. Më pëlqen që gjithçka është e përqendruar në një vend dhe të këtë barazi kushtesh për këdo. Edhe kur është organizuar në dy shtete nuk kam qenë dakord, e lëre më me formatin aktual, por për fat të mirë UEFA nuk duket e gatshme ta përsërisë atë që mua më duket një gabim trashanik.