U “zhduk” nga Vlora, Sarris i hedh në gjyq
Borxhet bëhen “mullar”, frikë edhe për padi nga ish-trajnerët
Flamurtari nuk gjen qetësi. Sikur të mos mjaftonte kriza e madhe që ka përfshirë klubin dhe rrëzimi në Kategorinë e Dytë, të tjera probleme shfaqen në horizont. Gjyqet sa vijnë edhe shtohen, ndonëse duket se janë bërë të zakonshme në Vlorë dhe as nuk bëjnë më përshtypje. Një tjetër lojtar i ka çuar kuqezinjtë në FIFA. “Panorama Sport” mëson se bëhet fjalë për Jorgos Sarris. Greku pretendon se nuk është paguar për periudhën që ka qenë në Vlorë në sezonin 2019-2020. Në këto kushte, 31-vjeçari ka vendosur që ta padisë klubin dhe do të jenë ndërkombëtarët që do të vendosin drejtësi. Megjithatë, mund të thuhet se edhe klubi ka pretendimet e veta ndaj qendërmbrojtësit. Në kohën kur ai luante te Flamurtari,
për një muaj rresht nuk u duk në stërvitje. Shkaku ishin pagat e pamarra, pavarësisht se justifikohej se ishte i dëmtuar. Qendërmbrojtësi u “zhduk” më pas nga Vlora pa lënë gjurmë, derisa zgjidhje për financat nuk ka gjetur.
BORXHET “MULLAR”
Janë shumë ish-lojtarë të cilët kanë fituar gjyqin në FIFA me Flamurtarin. Artim Pollozhani, Danilo Alvesh, Elton Kale, Muhamed Useini, Tomislav Bushiç, Goran Silajnovski, Kristian Sirgi kanë fituar çështjet e tyre dhe presin paratë. Kanë kaluar vite për disa prej tyre, por më kot, nuk kanë marrë gjë. Për të gjithë këta lojtarë ka pasur vendim të formës së prerë dhe ndoshta merkatoja është bllokuar për këto raste. Burime pranë këtyre lojtarëve
konfirmojnë për “Panorama Sport” se klubi nuk u ka bërë asnjë pagesë. Po ashtu, nuk ka asnjë tentativë për të mundësuar shlyerjen e pagesave me këste. Kujtojmë se për shkak të këtyre detyrimeve, Flamurtarit iu hoqën pikë nga klasifikimi dhe klubit iu bllokua merkatoja për tri sezone.
FRIKA NGA TRAJNERËT
Jo vetëm me ish-lojtarët, por klubi ka probleme të hapura edhe me ish- trajnerë. Ilir Daja çoi klubin vlonjat në Dhomën e Zgjidhjes së Konflikteve. Ai e fitoi gjyqin dhe klubi i detyrohet ta paguajë për një sezon të tërë. Por, në Vlorë ka frikë se të njëjtën gjë mund ta bëjnë edhe dy ish-trajnerët Marcelo Troisi dhe Rui Sampaio. Të huajt kanë marrë ndonjë “kacidhe” (ndryshe nga kolegët shqiptarë), por gjithsesi klubi u detyrohet shumë.