Lushkja dhe Malota: Kundër rumunëve do tentojmë surprizën
Mbrojtësi: Japim gjithçka me SC Universitatea Krajovën
Regi Lushkja është një nga futbollistët më të spikatur të Laçit, i cili shumë herë është treguar vendimtar me paraqitjet e tij në fushë. Kështu ndodhi edhe ndaj Podgoricës, ku goli i tij i dha edhe kalimin për në turin tjetër. Për “Panorama Sport” pas ndeshjes, 25-vjeçari pohon se për asnjë moment nuk e humbën durimin, ndaj edhe arritën të kualifikoheshin në fund. Kavajasi ia dedikon golin familjes. “Vuajtëm shumë në këtë ndeshje, e filluam shumë mirë dhe po bënim presing, por goli nuk po dilte. Gjithsesi, nuk e humbëm për asnjë moment durimin dhe besuam deri në fund që do ta kthenim edhe fituam një ndeshje të rëndësishme, sepse na kualifikoi. Jam i lumtur që shënova golin, por mbi të gjitha vlen kualifikimi, pasi ishte një periudhë jo shumë e mirë këto ditët e fundit, teksa kishim presion për ta kaluar turin. Në fund ia arritëm dhe jemi të lumtur për këtë gjë, ndërsa golin ia dedikoj familjes sime”, u shpreh fillimisht mesfushori i kurbinasve. Në lidhje me kundërshtarin e radhës, Lushkja e vlerësoi, por beson se duke dhënë maksimumin, edhe mund të arrijnë kualifikimin. “Me sa e kemi parë, është një ekip shumë i mirë dhe i fortë, por futbolli është i bukur dhe nuk i dihet asnjëherë. Mund të fitojmë apo humbasim, por ne do të shkojmë të japim maksimumin dhe të tentojmë të kualifikohemi”, mbylli prononcimin e tij për gazetën Regi Lushkja.
RENATO MALOTA
Për mbrojtësin e Laçit, Renato Malota, me rastet e panumërta që kanë krijuar në përballjen ndaj Podgoricës nuk duhet ta kishin lënë që ndeshja të shkonte deri te shtesat, por punën ua vështirësoi fakti që kundërshtari u mbrojt me 11 vetë. Megjithatë, në prononcimin për “Panorama Sport” pas ndeshjes, lezhjani pohon se kanë dominuar dhe rëndësi pas një ndeshjeje të tillë ka kualifikimi dhe për momentin t’i gëzohen këtij fakti. “Ishte një ndeshje shumë e ndërlikuar, pasi siç e patë, ata u mbrojtën me 11 lojtarë gjatë gjithë kohës dhe ishte shumë e vështirë që t’i depërtonim. Patëm shumë raste, por humbën edhe shumë mundësi të mira shënimi, por me atë çka treguam, e merituam kualifikimin. Po të ishim treguar pak më efikasë te rastet e pastra që patëm, duhet ta kishim mbyllur brenda 90 minutave, por futbolli i tillë është dhe rëndësi ka që u kualifikuam dhe jemi në turin tjetër”, u shpreh fillimisht 32vjeçari. Në lidhje me kundërshtarin e radhës me të cilin do të përballen, Malota pohon se është një ekip me financa të larta, por kurbinasit do të japin maksimumin në fushë e do të bëjnë detyrën e tyre. “Ne jemi me këmbë në tokë, ndeshjen e parë e kemi brenda dhe do mundohemi të japim maksimumin. Nuk kemi shumë njohuri për kundërshtarin, e dimë që është një ekip mjaft i mirë rumun dhe me financa të larta, por ne do të mundohemi të bëjmë punën tonë dhe t’i vlerësojmë aq sa duhet dhe në fund të shpresojmë të marrim maksimumin”, u shpreh në prononcimin enkas për gazetën një nga futbollistët më me eksperiencë në ekipin që drejtohet nga Shpëtim Duro.