AF Elbasani, administratori: Ja plani ynë për ekipin e ri
Mareglen Çoku: Do të ndërtohet një klub model
Akademia e Futbollit Elbasani është realiteti më i ri i futbollit shqiptar, i cili ka marrë kështu edhe zyrtarisht jetë. Synimi i kësaj skuadre është që të përfaqësojë qytetin e Elbasanit në garat kombëtare dhe ndërkombëtare dhe se fillimi i punës duket se është në rrugë të mbarë. “Panorama Sport” kontaktoi me administratorin e këtij klubi, Mareglen Çoku, i cili në fjalën e tij pohoi se synimi është të ngrihet një klub model dhe me baza të shëndosha, jo thjesht sa të rrisë numrin e skuadrave pjesëmarrëse në vendin tonë. Çoku shprehet se edhe pse në Kategorinë e Tretë, lojtarët e afruar do të jenë të njohur dhe që kanë dhënë një kontribut në Elbasan dhe në vendin tonë. “Rregullorja e do që ta nisim nga niveli më i ulët i futbollit shqiptar, por stafi që kemi përzgjedhur dhe lojtarët që kemi kontaktuar, të cilët shumë shpejt do t’i zyrtarizojmë, janë të një tjetër niveli. Qëllimi ynë është të ngremë një klub model dhe që të funksionojë në të gjitha hallkat e tij. Ekipi i parë është maja, nëse mund ta themi kështu, por pa ekipe moshash nuk ka asnjë vlerë, ndaj edhe trajnerët e moshave janë të po atij niveli si tek ekipi i parë, të cilët tanimë i njihni. Idetë i kemi të qarta, ta rikthejmë këtë skuadër dhe këtë qytet aty ku duhet të jetë. Fillimi ka ato vështirësitë e veta, por them se e kemi nisur mirë dhe jemi në rrugë të mbarë”, u shpreh fillimisht administratori i AF Elbasanit.
MERKATO
– Në lidhje me lojtarët që ekipi ka ndërmend të afrojë në merkato, Çoku pohon se bëhet fjalë për futbollistë cilësorë, por nuk dëshiron të ndalet në emra pa mbyllur zyrtarisht marrëveshjet. “Do të afrojmë lojtarë që më herët kanë milituar në Superiore dhe në Kategori të Parë, pra me futbollistë të këtij niveli kemi kontaktuar dhe thuajse kemi mbyllur gjithçka. Domethënë, nuk po mendojmë thjesht për Kategorinë e Tretë, por planet janë afatgjata. Ndërkohë, në datën 2 gusht kemi menduar të nisim edhe përgatitjet dhe për të mos i mohuar askujt të drejtën që mendon se mund t’i shërbejë kësaj skuadre si lojtar, mund të vijë edhe të bashkohet, pasi do të bëjmë fillimisht edhe një fazë seleksionimesh. Dyert janë të hapura për këdo”, përfundoi deklaratën për gazetën administratori i AF Elbasanit, Mareglen Çoku.