Nga Eto-ibra te Gallas-kol, ja shkëmbimet më të bujshme
Barcelona kërkon që të shkëmbejë Antuan Grizmanin me Saulin apo Zhoao Feliksin dhe kjo nuk është diçka e rrallë. Në historinë e futbollit, por sidomos në vitet e fundit ka pasur shumë shkëmbime të tilla.
ETO-IBRAHIMOVIÇ - Barcelona e di mjaft mirë çfarë do të thotë të bësh shkëmbime mes lojtarëve. Diçka e tillë ndodhi në vitin 2009 kur Samuel Eto pasi fitoi “Tripletën” u largua drejt Interit dhe në Katalonjë u transferua Zlatan Ibrahimoviç. Barça pagoi edhe 45 milionë euro të tjera përveç Etosë. Historia dihet si shkoi...
GARSIA-TORRES - Lëvizja e parë e “El Ninos” ndodhi në vitin 2007, kur e la klubin e zemrës së tij për të nisur aventurën angleze me Liverpulin. Torres shkoi te Liverpuli, i cili sapo kishte fituar Champions-in. Të kuqtë paguan 36 milionë euro dhe Luis Garsian për të.
BAPTISTA-REJES - Në ditën e fundit të merkatos, Reali i Madridit dhe Arsenali bënë një shkëmbim huazimesh. Hulio Baptista do të luante për “Topçinjtë”, ndërsa i ndieri Rejes veshi fanellën “galaktike” nën urdhrat e Fabio Kapelos. Andaluzi ishte i rëndësishëm në kampionatin e 30-të të Realit me 2 gola në ndeshjen e fundit.
SIMEONE-VIERI - Në qershorin e vitit 1999, Interi ëndërronte që të bashkonte në skuadrën e tij dyshen Ronaldo-vieri, i cili në atë kohë luante me Lacion. Zikaltrit përdorën Simeonen dhe paguan edhe 40 milionë euro.
KUAREZMA-DEKO - Sërish Barcelona si protagoniste. Në verën e vitit 2004 u arrit një shkëmbim portugezësh mes Portos dhe katalanasve. Barça donte Dekon dhe ofroi Kuarezmën.
GALLAS-KOL - Në vitin 2006 u prodhua një nga shkëmbimet më surprizuese mes dy klubeve londineze. Uilliam Gallas shkoi nga Çelsi tek Arsenali dhe Eshli Kol bëri të kundërtën.
SANÇEZ-MKITARJAN - Arsenali dhe Junajtidi bënë një shkëmbim të pastër mes dy lojtarëve që nuk ishin në nivelin e pritur. Sançez shkoi në “Old Traford” dhe Mkhitarjan në “Emirates Stadium”.
ARTUR-PJANIÇ - Të ndikuar nga kriza ekonomike, Barcelona dhe Juventusi bënë një lëvizje të papritur. Në Katalonjë përfundoi Pjaniç dhe në Torino braziliani. Askush nuk bindi.