“Pole” historik, Hamilton starton i pari në “Sprint”

Ndjekin Vershtapen dhe Botas, Ferrari i katërti me Lëklerk

Ka shkuar për Luis Hamiltonin “Pole position”-i për “Sprint Qualifying”, i vlefshëm për Çmimin e Madh të Britanisë, që shënon etapën e dhjetë sezonale në Formula 1. Një “pole” historik për pilotin e Mercedesit, i cili do ta nisë i pari format e ri që po eksperimenton F1, me kualifikueset e sotme që nuk do të mbahen sipas traditës, por do të zhvillohen në një garë prej 17 xhirosh (100 km), që do të përcaktojë edhe radhën e nisjes për garën e madhe të së dielës. Por, jo vetëm kaq, pasi “Sprint Qualifying” ka në dispozicion edhe pikë për pilotët, teksa fituesi i minigarës së sotme do të marrë 3 pikë, 2 shkojnë për vendin e dytë dhe 1 për të tretin, duke bërë që në total, hipotetikisht një pilot ka mundësinë ta mbyllë fundjavën me 28 pikë të fituara. Kështu, përveç rekordeve dhe arritjeve të jashtëzakonshme në karrierë, Hamilton shkruan emrin e tij edhe si piloti i parë, që merr “pole” në formatin e ri të Formulës 1 edhe pse në fakt nuk bëhet fjalë për një “pole” të mirëfilltë. Britaniku do të startojë në krye, ndërsa pas tij do të ketë liderin e kampionatit Maks Vershtapen. Holandezi i Red Bullit ishte vetëm 75 të mijtat më i ngadaltë. Ndërkohë, nga pozicioni i tretë do të niset, piloti tjetër i Mercdesit, Valteri Botas. Një rezultat të mirë regjistroi edhe Ferrari, me anë të Sharl Lëklerk (+0"075) që u klasifikua i katërti, ndërsa Karlos Sainz nuk shkoi më shumë se vendi i nëntë. Kështu, pista e Silverston garanton një betejë të dyfishtë, sot dhe nesër, me Luis Hamiltonin që do të kërkojë të rikuperojë pikë kundrejt Maks Vershtapenit, teksa ky i fundit kryeson kampionatin me 182 pikë, 32 më shumë se britaniku i Mercedesit, që mban vendin e dytë. “Sprint Qualifying” do të startojë sot në orën 17:30, ndërsa nesër në orën 16:00 do të jetë radha e garës.