Dinamo prezanton Ibraimin, një italian merr Kukësin: Dua të të eci në rrugën e Murinjos
“Kam mësuar prej Rejës, në gjurmët e Murinjos e Hansi Flikut”
Trajneri i ri i Kukësit, Diego Longo, u pre zantua dje në “Air Albania” në praninë e drejtorit sportiv, Pero Pejiç. 45-vjeçari firmosi me klubin verilindor, teksa së bashku me të, pjesë e ndihmësve do të jetë edhe asistenti Amadeo di Late, ish-portieri i Sampdorias dhe Livornos. Longo komentoi kontaktet e para me Kukësin, njohjen e lojtarëve dhe rivalëve si dhe dëshirën apo mentalitetin e tij të punës që do të kërkojë të implementojë te verilindorët.
FALËNDERIMET – “Para së gjithash ju falënderoj të gjithëve dhe në veçanti klubin që më dha këtë mundësi, si dhe për besimin. Ka shumë besim rreth meje dhe shumë ambicie. Më kanë treguar se me të vërtetë duan të arrijnë gjëra të mëdha dhe pranova të vij këtu. Që në momentin e parë që takova Aldon (Gjici), Pejiçin dhe menaxherin, folëm hapur. Erdha këtu prej besimit të dhënë. E rëndësishme është të jemi të gjithë bashkë, të punojmë në 100% dhe të arrijmë objektivat”.
KAMPIONATI SHQIPTAR
“E njoh kampionatin. E njihja që më parë. Megjithatë, jo me detaje dhe fillova ta studioja sapo nisëm bisedimet, para tri javësh. Kontakti i parë ka nisur që para 3 javësh. Më pëlqen Superiorja dhe ne mund të rritemi si ekip. Nuk flas dot për ekipet e tjera për momentin, pasi nuk dua të gjykoj për çfarë kanë bërë apo nuk kanë bërë. Sezonin e shkuar të tjerët ishin më mirë se ne, pasi 20 pikë diferencë janë shumë. Të shohim vetëm Kukësin dhe të përmirësohemi, sidomos në mentalitet dhe në dëshirën për të punuar fort e jo për të menduar që i kemi fituar ndeshjet, por të bëjmë gjithçka që t’i fitojmë”.
RAPORTI ME EDI REJËN “Trajnerin Edi Reja e kam njohur më parë, e kam takuar shumë vite më parë, kur ishte trajner i Lacios. Kam qëndruar 1 javë në qendrën stërvitore të Lacios dhe kam mësuar sepse është një njeri i hapur. Do ta kontaktoj së shpejti dhe do të takohemi. Për mua është e rëndësishme të jap më të mirën. Ne duhet të përmirësohemi. Kam pasur biseda me të dhe është nga ata që të vjen në ndihmë”.
MERKATOJA E KUKËSIT
“Kam shumë besim te futbollistët dhe te klubi që i ka afruar, por nuk i kam parë në fushë sepse s’i kam stërvitur ende. Ka lojtarë të rinj dhe me eksperiencë. Mund të përmend brazilianin që ka ardhur i cili shfaq cilësi të mira. Nuk do të futemi në fushë sikur i kemi fituar ndeshjet, do të punojmë që të futemi për të fituar. Nuk dua lojtarë që të mendojnë se nuk kanë nevojë për t’u përmirësuar, por ata që i përshtaten dhe japin gjithçka për grupin”. E SHKUARA SI ASISTENT
“Si asistentë kanë punuar edhe Flik, Tuhel dhe Murinjo. Shpresoj të jem në rrugën e tyre. Po bëj shaka... Është privilegj të punosh në klube të mëdha. Unë kisha kontratë me Dinamon e Kievit dhe vendosa të largohesha për të nisur eksperiencën si trajner. Kemi objektiva të rëndësishëm”. QËLLIMET E KLUBIT “Qëllimet e klubit janë të qarta: të jemi kompetitivë. Nuk mund të them tani që do të fitojmë kampionatin. Nuk e bën as Teuta, as Vllaznia e as Partizani. Ne do të bëjmë më të mirën tonë dhe do të rivalizojmë me të gjithë. Sa i takon merkatos, do të flas me klubin. Nuk flas për emra, por do flas me klubin për çfarë lojtarësh duhet të vijnë këtu”. MUNGESA E PEJIÇIT Në momentin kur Pejiç pyetet se si do ta zgjidhë në rolin e drejtorit mungesën e Pero Pejiçit goleador te Kukësi, ka ardhur edhe një batutë nga trajneri Longo. “Ndoshta do të na bëjë edhe Pejiç ndonjë gol. Do ta bëjmë të shënojë (qesh...)”, përfundoi deklarata e italianit të Kukësit.