“Trafik” në mesfushë, por vetëm 3 titullarë
Mesfusha e Interit është ende një "kantier i hapur". Mes lojtarëve që ka në dispozicion, shitjeve dhe blerjeve të mundshme, për trajnerin Simone Inzagi puna për zgjedhjet sapo ka filluar. Në mendjen e teknikut, vetëm tre prej tyre janë të pazëvendësueshëm. I pari në listë është Nikolo Barela, në qendër të projektit zikaltër dhe i konsideruar pashijshëm, edhe pse ofertat në shifra të larta që kalojnë 80 milionë euro për të nuk mungojnë. Marselo Brozoviç konsiderohet thelbësor për lojën e Interit dhe pavarësisht se është në skadencë kontrate, është i përfshirë pa diskutim në planet e zikaltërve. Blerja kryesore e merkatos deri tani, Hakan Çalhanoglu, ka besimin e plotë të ambientit zikaltër dhe do t'u bashkohet dy të parëve për të formuar boshtin e mesfushës interiste. Dilema e madhe ziklatër vazhdon të jetë Kristian Eriksen, që do ta marrë vetë vendimin për të ardhmen e tij. Në renditje në hierarki, të paktën në letër, janë disa elementë që mund të bëjnë surprizën dhe të pretendojnë për një vend titullari. Roberto Galjardini është element që i pëlqen trajnerit për lojën në ajër dhe aftësinë për t'u përshtatur. I radhës është Stefano Sensi, të cilin gjendja fizike e ka lënë jashtë fushave për një kohë të gjatë, por pas rikthimit Inzagi do të bëjë vlerësimet e tij. Amerikano-jugorët janë një tjetër temë diskutimi për formacionin zikaltër. Arturo Vidal, një nga të besuarit e ish-trajnerit Konte, po mendon largimin dhe do të vlerësojë mundësitë që mund ta kthejnë në kontinentin e tij, edhe pse ende nuk ka diçka konkrete. Ndryshe nga kilieni, Matias Vesino mund të jetë një nga "blerjet" reale të këtij sezoni, pas atij të lënë pas të karakterizuar nga dëmtimet. Për t'u shqyrtuar ngelet e ardhmja e Lusien Agume, francezi që mund të përfshihet në tratativa për blerjen e Nandez ose të qëndrojë si alternativë zëvendësuese e Brozoviçit. Ndërsa, Naingolan nuk do të jetë pjesë e grupit.