Alegri me dorë të hekurt, dënon Rabionë para Sampit
Kieza e Kuadrado në fushë, francezi s’grumbullohet
Adrien Rabio do të jetë një nga mungesat e Juventusit në sfidën e së dielës në orën 12:30 kundër Sampdorias. Zyrtarisht, mesfushori ka probleme fizike jo shumë të rënda, por që e kushtëzojnë grumbullimin e tij për ndeshjen e javës së gjashtë të Serisë A. Megjithatë, ka spekulime se mungesa e tij është një masë e marrë nga Masimiliano Alegri pas paraqitjeve zhgënjyese të francezit. Nën akuzë është qëndrimi në golin e dytë të Juventusit kundër Specias. Imazhet flasin qartë dhe tregojnë Rabion që ecën qetësisht, ndërkohë që Federiko Kieza lufton për ta rrëmbyer topin i cili pak sekonda më pas do të përfundojë në rrjetë. I gjithë veprimi i italianit është spektakolar, ndërkohë që kolegu francez e sheh si një spektator pa pagesë në fushën e lojës. Kjo qasje është vënë në dukje nga tifozët që kanë nisur një proces ndaj lojtarit në fjalë. Me sa duket, edhe Alegri ka bërë vlerësimet e tij duke vendosur ta lërë 26vjeçarin në shtëpi për takimin e nesërm.
KËRKESAT TAKTIKE - Ligësia sportive, me shumë vendosmëri në gjuajtje dhe futje më të vazhdueshme në zonën e rreptësisë: kjo është ajo që Alegri po kërkon dhe do t’i kërkojë Rabiosë gjatë gjithë kampionatit. Trajneri i Juventusit,
në konferencën pas Speciajuventus shfrytëzoi rastin për të nxjerrë në pah disa aspekte të interpretimit taktik të rolit nga ana e mesfushorit francez që ka vështirësi në rolin e anësorit të majtë. “Ka shumë për të përmirësuar”, deklaronte Alegri që të mërkurën e përmbysi ndeshjen me kalimin e
Kiezës në krahun e majtë. Kampioni i Europës ka shpejtësinë dhe aftësitë për të ndryshuar praktikisht lojën duke krijuar konfuzion, epërsi numerike dhe raste për gol. Nuk është rastësi që rastet e shënimit kanë lindur me pasimin e ish-lojtarit të Fiorentinës, teksa po vepronte në të majtë. Ky ndryshim i ri taktik mund ta përjashtojë Rabionë nga formacioni për një kohë të gjatë nëse Alegri gjen ekuilibrin e duhur me Kuadradon dhe Kiezan në të njëjtën kohë. Kolumbiani është gati dhe eskperimenti në horizont, ndaj edhe përjashtimi i Rabiosë nuk duket si zgjedhje për shkak të problemeve fizike.