Liverpuli futet në garë për Halandin, Klop: Do të na mungojë Tiago disa javë
Të kuqtë zbresin sot në fushë kundër Brentfordit
Liverpuli i është shtuar listës së gjatë të klubeve të interesuara për Erling Halandin. Sulmuesi i Dortmundit e ka nisur këtë sezon atje ku e la të shkuarin, me 11 gola në 7 ndeshjet e para në të gjitha kompeticionet dhe gara për firmën me 21-vjeçarin verën e ardhshme do të mbetet shumë e fortë. Klubi e ka pranuar se sa e vështirë do të jetë për ta mbajtur norvegjezin edhe pas këtij sezoni sepse klauzola e prishjes së kontratës së tij zbret në 90 milionë euro (77 milionë paund). Sipas “Mundo Deportivo”-s, përveç Barcelonës dhe Realit të Madridit, listës së klubeve të interesuara i është shtuar edhe Liverpuli. “Sigurisht që do të jetë e vështirë që ai të qëndrojë, por ne do të përpiqemi që t’i mbajmë lojtarët tanë më të mirë në të ardhmen”, tha shefi i Dortmundit, Hans-joakim Vacke për “Welt am Sonntag”.
KLOP – Por përpara se të vijë merkatoja, Jyrgen Klopi, ka shqetësime të tjera në mendjen e tij. Dhe në vigjilje të sfidës së sotme kundër Brentfordit, trajneri i “Reds”-ave konfirmoi lajmin e keq të dëmtimit muskulor të Tiago Alkantarës në ndeshjen kundër Kristal Palasit. Mesfushori spanjoll do të humbasë edhe ndeshjen kundër Portos në Champions dhe Sitit më 3 tetor dhe do të mund të rikthehet vetëm pas pushimit të ndeshjeve të kombëtareve. “Nuk është e qartë se kur Tiago do të rikthehet, është një tërheqje muskulore në kofshë, por ndoshta do të kthehet pas pushimit të ndeshjeve të kombëtareve. Nuk mendoj se mund ta bëjë më herët.
Të shohim”, tha gjermani në konferencë. Keita do ta humbasë ndeshjen me Brentfordin, por Klop tha se mesfushori do të rikthehet shumë shpejt: “Nuk ka asgjë serioze, por është një shqetësim që e pengon të jetë në ndeshjen e radhës dhe ndoshta edhe më gjatë”. Lajmi i
mirë është rikthimi i Trent Aleksander-arnoldit dhe i Roberto Firminos. Mbrojtësi ka humbur dy ndeshjet e fundit për shkaqe shëndetësore, ndërkohë që sulmuesi brazilian nuk luan që prej tërheqjes muskulore që pësoi në ndeshjen kundër Çelsit më 31 gusht.