Spektakël pa fitues, Laçi shtang Kukësin
Zarubica dopietë, Milunoviç e Basha s’mjaftojnë për triumfin
Laçi dhe Kukësi i bëjnë të gjitha në Kamzë, por në fund ka vetëm barazim 2-2. Një ndeshje dramatike është luajtur dje në stadiumin ku si pritës ishin kurbinasit, por katër golat e shënuar nuk kanë prodhuar fitues. Verilindorët e drejtuar nga Diego Longo ishin më afër fitores, por me sa duket ishte dita e sulmuesit malazez të Laçit, Dejan Zarubica, i cili shënoi dy gola duke zhvlerësuar disi lojën fantastike të Edi Bashës. Ky i fundit u bë protagonist absolut për Kukësin, bashkë me serbin Luka Milunoviç. Dominimi i verilindorëve nuk mjaftoi dhe në frymën e fundit kurbinasit morën një pikë të artë. Pas tri javësh kampionat, Kukësi vijon të kryesojë i vetëm renditjen duke përfituar edhe nga barazimet e shumta të javës që lamë pas.
PJESA E PARË
Trajneri i Laçit, Dejan Vukiçeviç, kishte lënë Guindonë në stol dhe i besoi Zarubicës në majën e sulmit. Megjithatë, kurbinasit janë si të fikur në pjesën e parë. Kukësi qarkullon mirë topin dhe del shpejt në kundërsulm me treshen Milunoviç, Feijao dhe Basha. Portieri Alen Sherri bën mrekullinë në të paktën tri raste, por në minutën e 30të nuk ka se çfarë të bëjë pas goditjes së Milunoviçit. Janë minuta të shkëlqyera për Kukësin, që pasi kalon në avantazh insiston për të dyfishuar shifrat. Mirëpo, sulmuesit verilindorë shpërdorojnë jo pak, edhe pse gjejnë një Laç gati të shpartalluar në mbrojtje. Pjesa e parë mbyllet me goditjen e Gjelbrim Taipit, që shkon në duart e Sherrit.
PJESA E DYTË
Pas pushimit, Laçi bën menjëherë tre ndryshime, teksa futen në fushë Guindo, Zulfiji dhe Bytyqi. Kurbinasit janë më agresivë dhe Guindo i afrohet barazimit, por Kukësi është sërish aty duke preferuar kundërsulmet dhe shfrytëzuar shpejtësinë e kroatit Basha dhe brazilianit Feijao. Në momentin më të mirë të bardhezinjve, një kundërsulm i verilindorëve sjell golin e dytë, këtë herë për meritë absolute të Bashës. Laçi duket i dorëzuar, por mjafton një shkëndijë për t’i shkundur kurbinasit. Në skenë del Zarubica, që bën një lëvizje fantastike në zonë dhe pas goditjes me të djathtën rihap takimin. Mazrekaj mundohet të shpikë diçka, por e ka të vështirë. Verilindorët kërkojnë ta ulin ritmin e Laçit dhe madje kanë shansin ta mbyllin ndeshjen me rastet që krijojnë afër fundit. Por, nuk ishte e thënë të ruanin rezultatin dhe minuta e 95-të rezulton fatale. Zarubica është në kohën dhe vendin e duhur për t’i dhënë një pikë ekipit kurbinas. Pasi shifrat shkojnë 2-2, Laçi merr zemër dhe Lushkja tenton portën nga një goditje dënimi, por Tafa grushton me vështirësi në korne duke evituar golin e tretë. Takimi mbyllet me kartonin e kuq të Lulajt.