“Nderi i Kombit”, Gjergj Ruli vlerësohet me titullin e lartë
Presidenti Meta dekoroi ish-rekordmenin e atletikës
Gjergj Ruli, ish-kampioni i mirënjohur, aktualisht presidenti i Federatës Shqiptare të Atletikës, është vlerësuar me titullin e lartë “Nderi i Kombit” nga presidenti i Republikës, Ilir Meta. Në një ceremoni solemne të mbajtur në Durrës, pikërisht në 60-vjetorin e tij të lindjes, Ruli u vlerësua nga kreu i shtetit për kontributin e jashtëzakonshëm që ka dhënë për atletikën dhe sportin shqiptar. Meta e përshëndeti gjithashtu dekorimin e Rulit, me anë të një dedikimi në faqen e tij zyrtare ku shkruan: “Së bashku me urimet më të ngrohta, i akordova dekoratën e lartë ‘Nderi i Kombit’ njërit prej legjendave dhe krenarive të atletikës dhe sportit shqiptar, Gjergj Ruli. Vlerësimi i merituar është shprehje e mirënjohjes për kontributin e shquar të dhënë prej tij për zhvillimin cilësor të atletikës në vendin tonë, si kampion dhe rekordmen i rezultateve të shkëlqyera, fitues i qindra titujve e trofeve brenda e jashtë vendit, por edhe si trajner i kampionëve të rinj, si Izmir Smajlaj, që po lartësojnë imazhin e
Shqipërisë në arenat ndërkombëtare. Atletika, mbretëresha e të gjitha sporteve, meriton të mbështetet më shumë si një mundësi e shkëlqyer për të arritur rezultate të larta në shumë disiplina, për promovimin e imazhit të vendit dhe vlerave sportive kombëtare, por njëkohësisht edhe për t’i larguar të rinjtë nga veset dhe orientuar ata drejt rrugës së suksesit”, deklaroi ndër të tjera presidenti Meta. Në këtë ceremoni i pranishëm ishte edhe Dobromir Karamarinov, president i Federatës Europiane të Atletikës, si dhe personalitete të tjera të atletikës ndërkombëtare. Kreu i FSHA-SË mori gjithashtu urime të shumta “online” nga figura të atletikës botërore.