Lisbona kthehet në ferrin e Barçës
Benfika turpëron ekipin e Kumanit, vetëm Malmoja më keq se katalanasit
Nuk ka qenë Mesi në fushë për Barce lonën, por përballë nuk ka qenë as Bajerni! E megjithatë, Barça di vetëm të zhgënjejë. Në "Da Luz" përsëritet historia. Vërtet stadiumi i Lisbonës mban emrin e dritës, por Barcelona vetëm dritë nuk ka parë në këtë stadium. Një vit pas humbjes turpëruese përballë Bajernit të Mynihut, 2-8, në po të njëjtin stadium Barcelona kthehet të shpartallohet këtë herë nga Benfika vendëse 3-0. Të shumtë mund të jenë ata që mendojnë se Barcelona nuk e meritoi humbjen në "Da Luz" përballë Benfikës. Aq më shumë duke parë pjesën e parë, kur spanjollët nuk luajtën keq. Ndoshta edhe fati nuk ishte me katalanasit, pasi mundësitë për shënim nuk kanë munguar, por në fund, në futboll llogaritë bëhen me gola dhe shifrat janë kokëforta. Barcelona ka pësuar humbjen e dytë radhazi në Ligën e Kampioneve, duke u turpëruar nga Benfika me shifrat 0-3 dhe tashmë e gjen veten në një pozitë aspak komode në Grupin E. Dy ndeshje, zero pikë, zero gola të shënuar 6 gola të pësuar. Më keq se kaq nuk mund të shkojë për ekipin e Kumanit dhe ndoshta duhen hapur librat e historisë për të gjetur një nisje të tillë katastrofale të katalanasve. Ndoshta Kuman mund të ketë pasur të drejtë kur pati paralajmëruar të gjithë se "Barcelona duhet ta harrojë Championsin", por një tjetër humbje e thellë as ai vetë nuk e kishte menduar.
DUSHI I FTOHTË - E të mendosh se Barcelona nuk ka luajtur keq, veçanërisht në pjesën e parë. Dhe më shumë për fajin e saj e ka gjetur veten 0-1. Në fakt, Benfika e ka nisur takimin me gol që nga dhomat e zhveshjes. Që në minutën e tretë Darvin Nunjez ka kaluar në epërsi vendësit, duke nxjerrë në pah të gjitha problemet në mbrojtjen e katalanasve. Një dush i ftohtë për Barcelonën, që ka reaguar fort dhe në pjesën e parë e ka pasur mundësinë për ta kthyer takimin, por gabimet në sulm nuk i kanë lejuar që ta mbyllë me një tjetër rezultat këtë pjesë.
SHKËRMOQJA - Në pjesën e dytë është pritur reagimi i fortë i Barcelonës, por vetëm reagim nuk ka pasur. E kundërta ka ndodhur, ka qenë Benfika që ka shkërmoqur "Blaugranat". Nunjez ka goditur shtyllën (53'), por Rafa Silva nuk ka falur (69'), duke shënuar golin e dytë pas një tjetër gafe në mbrojtjen e Barçës. Për t'i
vënë kapakun sfidës ka menduar sërish Nunjez që ka shënuar me penallti. Dhe ndoshta mund t'i ketë vënë kapakun edhe aventurës së Kumanit në stolin e Barçës që e ka mbyllur takimin me 10 vetë pas daljes me të kuqe të Erik Garsias.