Antoni pezull, sulmi fut në “siklet” Beqirin
Konkurrenca e shtuar në ofensivë, trajneri i pavendosur
Bylisi nuk ka më në plan që të ndalet. Pasi kanë likuiduar Besëlidhjen, Erzenin dhe Turbinën, tashmë duan “kokën” e Pogradecit. Pasi morën të vetëm kryesimin, as që e mendojnë ta lëshojnë. Me këtë ide do të udhëtojnë në transfertë dhe blofet janë përfundimisht të ndaluara. Skuadra do t’u japë sot paradite dorën e fundit përgatitjeve dhe gjatë pasdites do të marrë rrugën drejt qytetit liqenor, atje ku të shtunën do të ketë një tjetër “provim”. Ka disa dilema para këtij 90-minutëshi. Ballshiotët janë me “sy” te Beji Antoni, i cili po vuan ende dëmtimin që pësoi në Shijak. Disa goditje të rënda që mori nga kundërshtarët, e detyruan që të linte lojën shumë shpejt dhe kavilja prej dy javësh rezulton e ënjtur. Stafi mjekësor e ka në vëzhgim të plotë dhe gjendja po shkon drejt përmirësimit, megjithatë nuk dihet a do të rrezikohet apo jo në Pogradec. As me cërrikasit nuk e aktivizuan, ndonëse ishte i gatshëm në stol. Gjasat janë që edhe këtë herë të grumbullohet, por për të luajtur nuk ka garanci. Gjithsesi, zgjedhjet nuk është se i mungojnë trajnerit. Madje, ky është sikleti i vërtetë që ka Jeton Beqiri. Me afrimet e bëra gjatë verës dhe eksperiencës që fituan lojtarët e vjetshëm në elitë, konkurrenca në sulm është shtuar ndjeshëm. Ka lojtarë që kanë bërë vërtet mirë në këto 270 minuta dhe ende nuk dihet se kush do ta nisë si titullar javën e 4-t. Skuadra ka funksionuar më së miri në këtë repart dhe 7 golat e shënuar janë dëshmia më e mirë. Ballshiotët krenohen edhe me prapavijën, që rezulton e pathyeshme. Asnjë gol i pësuar, e kthen në “blind”. Janë skuadra e vetme me këtë bilanc në Kategorinë e Parë.