Sauthgejt rikthen Tomorin pas 2 vitesh dhe sulmon Bonuçin
Anglia shpall listën, trajneri: Italianët bënë lojëra, nuk na mundën
Trajneri i Anglisë, Garet Sauthgejt, publikoi listën e lojtarëve për ndeshjet kualifikuese të Botërorit në Katar ndaj Andorrës dhe Hungarisë. Ajo që bie në sy është rikthimi në skuadër i Fikajo Tomorit i cili pas paraqitjeve të mira me Milanin duket se ka fituar sërish besimin në kombëtaren angleze. Trajneri i “Luanëve” replikoi gjatë konferencës për shtyp pas shpalljes së listës edhe me mbrojtësin e Italisë, Leonardo Bonuçi, i cili tha se italianët ishin 10 herë më gati se anglezët për ta fituar ndeshjen. “Kishim aq eksperiencë për ta kuptuar se italianët do t’i përdornin ato fjalë për të karikuar veten. Por ajo ndeshje përfundoi në barazim, të mos e harrojmë këtë. Edhe pse në fund ata e meritonin të fitonin trofeun, nuk mendoj që ai episod ishte deciziv”, tha Sauthgejt.
PËR TOMORIN – Mbrojtësi i Milanit, Fikajo Tomori, është thirrur për dy ndeshjet e radhës në kombëtare. Për trajnerin, mbrojtësi shtatlartë ka bërë një paraqitje të mirë deri tani me italianët dhe meritonte të ishte në skuadër. “Isha shumë i impresionuar me atë çfarë ka dhënë deri tani me Milanin. Edhe në sezonin e kaluar e ndoqëm me vëmendje, por mendoj që tani në Milano ai po kalon një moment më të mirë. Është pjekur dhe ka nisur të kuptojë shumë gjëra”.
PËR KUALIFIKUESET - “Do të kemi mundësi ta mbyllim kualifikimin dhe për këtë duhet përqendrim dhe asnjë nënvlerësim. Në këtë grup nuk ka skuadër të lehtë dhe fakti që katër skuadra janë në luftë për një biletë në Botëror tregon edhe një herë vështirësinë që do të kemi deri në fund. Por unë jam optimist që do të kualifikohemi të parët, djemtë mezi presin të zbresin në fushë dhe t’i mbyllin sa më parë llogaritë”, u shpreh trajneri.