Halili i dhuron autobus ekipit, mjeku shpëton Velkoskin
Në minutën e 18-të, në vrapim e sipër Velkovski përplaset me një kundërshtar dhe për pak sa nuk i kalon gjuha poshtë. Ndërhyjnë dy stafet mjekësore të skuadrave dhe ka qetësi në stadium. Portierët e Tiranës ishin të parët që zbritën në stadium. Më pas u ndoqën nga gardianët kurbinas. Edhe nga lojtarët bardheblutë dolën për të nisur nxehjen. Dy presidentët ishin përkrah njëri-tjetrit në tribunën VIP, ndërsa stadiumi ishte i rrethuar nga një numër i madh forcash sigurie. Numër i kënaqshëm spektatorësh, paçka se ndeshja Tirana-laçi është një nga ndeshjet më të rëndësishme të javës së katërt. Tifozëria ka qenë në stadium, ndërsa skuadra e kënaqur me fitore. Në fund ekipi përshëndet të pranishmit në stadium. Trajneri i Laçit kishte vendosur që titullar në sfidën me Tiranën të aktivizohej Dajsinani, duke ulur Sherrin në stol.
Të pranishëm në stadium, disa ish-trajnerë dhe lojtarë të dy skuadrave, në veçanti Sulejman Starova. Orges Shehi, në prag të fillimit
të pjesës së dytë, del nga dhomat e zhveshjes për të këshilluar Toshevskin, i cili hyri në pjesën e dytë në vend të Tolit me karton të verdhë. Orges Shehi ka qenë gjithë ndeshjen në këmbë. Trajneri ka këshilluar pa fund lojtarët bardheblu në çdo cep të fushës. Tirana është skuadra e radhës që bëhet me autobus. Klubi ka blerë një mjet për skuadrën që të udhëtojë ashtu si çdo skuadër tjetër në Superiore.
Mario Beshiraj ishte me paterica në stadium. Lojtari është dëmtuar dhe i duhen të paktën 20 ditë që të jetë në fushën e lojës.
Kristal Abazaj ishte një tjetër futbollist i njohur që ndoqi sfidën nga shkallët e stadiumit. Lojtari u përfol në verë si një afrim i mundshëm te bardheblutë.